पडळकर, खोत यांच्याविरोधात गुन्हा दाखल करा

पडळकर, खोत यांच्याविरोधात गुन्हा दाखल करा
घाटकोपर, ता. ११ (बातमीदार) : राष्ट्रवादी शरदचंद्र पवार पक्षाचे अध्यक्ष तथा ज्येष्ठ नेते शरद पवार यांच्यावर आमदार गोपीचंद पडळकर व सदाभाऊ खोत यांनी अत्यंत आक्षेपार्ह विधाने केली. त्यांनी खालच्या पातळीवरील टीका केल्याने त्यांच्याविरोधात फौजदारी गुन्हा दाखल करावा, अशी मागणी पक्षाचे प्रवक्ते तथा मुंबई युवक अध्यक्ष ॲॅड. अमोल मातेले यांनी केली आहे. दोन्ही नेत्यांकडून अत्यंत खालच्या पातळीवरील अपमानास्पद व जातीय तेढ निर्माण करणारी विधाने केली जात आहेत. त्यामुळे केवळ एका नेत्याचा नव्हे तर महाराष्ट्राच्या सामाजिक आणि राजकीय संस्कृतीचा अपमान होत असल्याचा आरोप मातेले यांनी केला आहे. याबाबत त्यांच्यावर फौजदारी गुन्हा दाखल करून योग्य कारवाई करावी, अशी मागणी साकीनाका पोलिस ठाण्यात लेखी निवेदनाद्वारे करण्यात आली आहे. यावेळी पक्षाचे प्रवक्ते तथा मुंबई युवक अध्यक्ष ॲड. अमोल मातेले, मुंबई सरचिटणीस इमरानभाई तडवी, चांदिवली तालुका अध्यक्ष ॲड. कुतुब आलम शहा, सचिव संतोष लांडे, वॉर्ड अध्यक्ष राजेंद्र ढवळे, असिफ मुजावर आदी उपस्थित होते.