भिवंडी महापालिकेत पुन्हा हाणामारी

भिवंडी ता.११(बातमीदार): महापालिका मुख्यालयात आयुक्तांच्या दालनाबाहेर ठेकेदारांमध्ये झालेली हाणामारीची घटना ताजी असतानाच मंगळवारी ठेकेदार आणि पालिका कर्मचाऱ्यांत हाणामारीची घटना घडली आहे. याप्रकरणी दोघांनी परस्परविरोधी तक्रार दिल्याने गुन्हे दाखल आहेत.
पालिकेत ठेकेदारीचे काम करणारी महिला तिच्या मावस भावासोबत प्रभाग समिती क्रमांक तीनच्या कार्यालयात सुरू असलेल्या कामाच्या पाहणीसाठी गेली होती. त्याचवेळी पालिका कर्मचारी संतोष म्हस्केने कोणतेही कारण नसताना त्यांना शिवीगाळ करण्यास सुरुवात केली. त्याचा जाब महिलेने विचारला असता संतोषने हातातील वस्तूने महिलेवर हल्ला केला. याप्रकरणी महिलेने दिलेल्या तक्रारीवरून संतोष म्हस्के आणि अप्पा म्हस्केंविरोधात गुन्हा दाखल आहे तसेच शासकीय कामकाजात अडथळा निर्माण केल्याची तक्रार म्हस्के याने केल्याने महिलेवरही गुन्हा दाखल आहे.