खड्डयात पडून मुलाचा मृत्यू

नवी मुंबई, ता.११(वार्ताहर): कोपरखैरणे सेक्टर-५ मध्ये इमारतीच्या बांधकामासाठी खोदलेल्या खड्डयात पडून एका सातवर्षीय मुलाचा मृत्यू झाला. अंकित ठनगुगा मुलाचे नाव असून बुधवारी सायंकाळी ही घटना घडली.
कोपरखैरणे सेक्टर-५ मध्ये राहणारा अंकित सेक्टर-४ मधील जिजामाता कॉन्वेंट स्कूलमध्ये शिकत होता. बुधवारी सायंकाळी शाळेतून घरी आल्यानंतर मुलांसह खेळण्यासाठी बाहेर पडला. यावेळी महापालिका शाळेच्या बाजूला इमारतीच्या बांधकामासाठी खोदलेल्या खड्ड्यात पाय घसरून पडला. अंकितसोबत खेळणाऱ्या मुलांनी याबाबतची माहिती त्याच्या पालकांना दिल्यानंतर घटनास्थळावर धाव घेतली. पाण्यात बुडालेल्या अंकितला बाहेर काढून तत्काळ रुग्णालयात नेण्यात आले. मात्र त्यापूर्वीच त्याचा मृत्यू झाल्याचे डॉक्टरांनी घोषित केले. अंकितचा अशा पद्धतीने मृत्यू झाल्याने परिसरात हळहळ व्यक्त करण्यात येत आहे. तसेच कोपरखैरणे पोलिसांनी अकस्मात मृत्यूची नोंद करून पुढील कार्यवाहीला सुरूवात केली आहे.