एकतर्फी प्रेमातून हत्येचा निकाल

ठाणे, ता. १३ (वार्ताहर)ः प्रादेशिक परिवहन कार्यालयासमोर एकतर्फी प्रेमातून महाविद्यालयीन तरुणीची हत्या करण्यात आली होती. या घटनेतील मुख्य आरोपीला आजन्म कारावासाची शिक्षा, तसेच ५० हजारांच्या दंडाची शिक्षा ठाणे सत्र न्यायालयाने सुनावली आहे.
एकतर्फी प्रेमप्रकरणातून ४ ऑगस्ट, २०१८ रोजी सकाळी अकराच्या सुमारास ठाणे कॉलेजमध्ये शिकणाऱ्या प्राची झाडेवर आरोपी आकाश पवारने १३ वार केले होते. या हल्ल्यात तरुणीचा मृत्यू झाल्यामुळे नौपाडा पोलिसांनी आरोपीला ५ ऑगस्ट २०१८ रोजी अटक केली होती. ठाणे सत्र न्यायालयात ३१ आक्टोबर २०१८ रोजी नौपाडा पोलिसांनी शवविच्छेदन अहवाल, साक्षीदार, प्रत्यक्षदर्शींचे जबाब नोंदवून आरोपपत्र सादर केले होते. या प्रकरणात सरकारी वकील ए. पी. लाडवंजारी यांनी न्यायालयात भक्कम पुरावे, २१ साक्षीदारांचे जबाब, सीसीटीव्हीचे चित्रण दिले. त्यानुसार न्यायमूर्ती ए. बी. अग्रवाल यांनी गुरुवारी (ता. १२) आरोपीला दोषी ठरवत आजीवन कारावासाची शिक्षा, तसेच ५० हजारांच्या दंडाची शिक्षा ठोठावली आहे.