कुत्रा, मांजराचा चावा बेतला जिवावर

कल्याण, ता. १३ (वार्ताहर) : दोन महिन्यांपूर्वी भटक्या कुत्र्यापाठोपाठ एका मांजरीने घेतलेल्या चाव्याकडे दुर्लक्ष करणे एका तरुणाच्या जीवावर बेतले आहे. शुक्रवारी सकाळी कल्याण पश्चिमेला राहणाऱ्या या तरुणाचा मुंबईतील कस्तुरबा रुग्णालयात मृत्यू झाला.
कल्याण पश्चिमेतील गोल्डन पार्कमध्ये राहणाऱ्या शुभम चौधरीला (२७) दोन महिन्यांपूर्वी एक भटका कुत्रा आणि मांजराने चावा घेतला होता; पण उपचारांकडे दुर्लक्ष केल्याने १० डिसेंबरला शुभमची प्रकृती अचानक बिघडली होती. सुरुवातीला कल्याणमधील खासगी रुग्णालयात त्याला भरती करण्यात आले. त्यानंतर कळव्यातील छत्रपती शिवाजी महाराज रुग्णालयात त्याला हलवण्यात आले; पण प्रकृती बिघडतच असल्याने अखेर मुंबई येथील कस्तुरबा रुग्णालयात दाखल करण्यात आले; मात्र उपचारादरम्यान त्याचा मृत्यू झाला. डिप्लोमा केलेला शुभम नोकरीच्या शोधात होता; पण निष्काळजीपणामुळे त्याचा मृत्यू झाल्याने परिसरात शोककळा पसरली आहे.