व्यावसायिकाला एक कोटीचा गंडा

व्यावसायिकाला एक कोटीचा गंडा
मालाडमधील घटना; गुन्हा दाखल
अंधेरी, ता. १६ (बातमीदार) ः शासकीय कंत्राट मिळाल्याची बतावणी करून एका वृद्ध व्यावसायिकाची फसवणूक केल्याप्रकरणी दीपक शर्मा या व्यावसायिकाविरुद्ध दिंडोशी पोलिसांनी गुन्हा दाखल केला आहे. त्याच्यावर एक कोटीचा अपहार करून फसवणूक केल्याचा आरोप असून त्याच्या अटकेसाठी पोलिसांनी विशेष मोहीम हाती घेतली आहे.
वृद्ध तक्रारदार मालाड येथे राहत असून दीपक हा त्यांचा परिचित व्यावसायिक आहे. त्याची एक खासगी कंपनी असून या कंपनीला उत्तर प्रदेश सरकारकडून वाळू सप्लायचे एक मोठे कंत्राट मिळाले आहे. त्यासाठी आर्थिक मदतीची गरज आहे. काम पूर्ण करण्यासाठी त्याने आर्थिक मदत करण्याची विनंती करून तीन टक्के व्याजदर देण्याचे आमिष दाखविले होते. त्याच्यावर विश्‍वास ठेवून त्यांनी त्याला एक कोटी रुपये दिले होते; मात्र दिलेल्या मुदतीत त्याने त्यांना व्याजाची रक्कम दिली नाही.
अधिक चौकशी केली असता त्याला उत्तर प्रदेश सरकारकडून कुठलेही वाळू सप्लायचे कंत्राट मिळाले नसल्‍याचे समोर आले. त्यामुळे त्यांनी त्याच्याकडे एक कोटीची मागणी सुरू केली होती; मात्र त्याने ती रक्कम न देता या रकमेचा वैयक्तिक फायद्यासाठी वापर केला होता. त्‍यानंतर याबाबत दिंडोशी पोलिस ठाण्यात त्‍यांनी तक्रार दिली.