प्रिमीयर १

रश्मिकाच्या वक्तव्यावर चाहत्यांचा रोष!

अभिनेत्री रश्मिका मंदाना आणि विकी कौशल यांचा मुख्य भूमिका असलेला ''छावा'' हा चित्रपट १४ फेब्रुवारीला प्रदर्शित झाला. लक्ष्मण उतेकर दिग्दर्शित या चित्रपटाने पहिल्याच दिवशी तब्बल ३१ कोटी रुपयांचा गल्ला जमा केला, मात्र चित्रपटाच्या यशाच्या पार्श्वभूमीवर रश्मिकाच्या एका वक्तव्यावरून नवा वाद निर्माण झाला आहे. चित्रपटाच्या प्रमोशनल इव्हेंटदरम्यान रश्मिका मंदानाने स्वतःला ''हैदराबादची'' असल्याचे म्हटले. कर्नाटकातील कूर्ग येथे जन्मलेल्या रश्मिकाने कन्नड चित्रपटसृष्टीतून आपल्या करिअरला सुरुवात केली, मात्र तिला खरी प्रसिद्धी तेलुगू सिनेमातून मिळाली. त्यामुळेच अनेक कन्नड चाहत्यांना तिचे हे विधान खटकले. काही चाहत्यांनी तिला आपल्या मूळ प्रदेशाची ओळख नाकारल्याचा आरोप केला, तर काहींनी तिला ''संधीसाधू'' म्हणत तिच्यावर टीका केली. या वक्तव्यावर अनेकांनी सोशल मीडियावर संताप व्यक्त केला आहे. एका चाहत्याने लिहिले, "कधी कधी रश्मिकावर दया येते की कन्नड प्रेक्षकांकडून तिला इतकी नकारात्मकता का मिळते." काहींनी तिच्यावर तेलुगू प्रेक्षकांना प्रभावित करण्याचा प्रयत्न करत असल्याचा आरोप केला. रश्मिकाच्या या वक्तव्यामुळे तिच्या कन्नड चाहत्यांमध्ये तीव्र नाराजी पसरली आहे. यापूर्वीही तिच्या काही विधानांमुळे ती वादाच्या भोवऱ्यात अडकली होती. आता ''छावा''च्या यशाच्या गडद छायेत हा वाद तिच्या करिअरवर काय परिणाम करतो, हे पाहणे महत्त्वाचे ठरेल.
.................

इलियाना डिक्रूझ पुन्हा आई होणार!

बॉलीवूड अभिनेत्री इलियाना डिक्रूझने नवीन वर्षाच्या पहिल्याच दिवशी चाहत्यांना शुभेच्छा देताना एक सूचक व्हिडिओ शेअर केला होता, ज्यामुळे ती पुन्हा गरोदर असल्याची शक्यता वर्तवली जात होती. आता इलियानाने स्वतःच सोशल मीडियावर आपल्या दुसऱ्या गरोदरपणाची पुष्टी दिली आहे. इलियानाने आपल्या इन्स्टाग्राम स्टोरीवर मध्यरात्रीच्या खाण्याचा एक फोटो शेअर केला. कॅप्शनमध्ये तिने दुसऱ्यांदा मातृत्वाचा स्वीकार केल्याचे स्पष्ट झाले. याआधी इलियानाने नवीन वर्षाच्या शुभेच्छांसह एक व्हिडिओ शेअर केला होता, ज्यामध्ये ती आणि तिचा पती मायकेल डोलन आपल्या मुलाला प्रेमाने वाढवत असल्याचे दिसत होते. ऑक्टोबरमध्ये या व्हिडिओमध्ये ती प्रेग्नन्सी टेस्टचा सकारात्मक निकाल कॅमेऱ्यासमोर दाखवताना दिसली होती. इलियाना आणि मायकेलने २०२३ मध्ये गुपचूप लग्न केले. एप्रिल २०२३ मध्ये तिने आपल्या पहिल्या बाळाच्या आगमनाची घोषणा करत एका बेबी वनपीसचा फोटो शेअर केला होता.
.................

‘आशिकी ३’मध्ये कार्तिकची लक्षवेधी झलक

‘सोनू के टीटू की स्वीटी’ आणि ‘भूल भुलैया २’सारख्या हिट चित्रपटांनी बॉक्स ऑफिसवर धुमाकूळ घालणारा कार्तिक आर्यन लवकरच ‘आशिकी ३’मध्ये झळकणार आहे. १९९० मध्ये आलेला ‘आशिकी’ आणि २०१३ मध्ये प्रदर्शित झालेला ‘आशिकी २’ यांनी संगीतप्रेमींच्या मनात विशेष स्थान निर्माण केले होते. आता ‘आशिकी ३’ची उत्सुकता वाढली आहे. नुकत्याच प्रदर्शित झालेल्या टीझरमध्ये कार्तिक आर्यनच्या हटके लूकने चाहत्यांचं लक्ष वेधून घेतले आहे. हातात सिगारेट, वाढलेले केस, दाढी आणि संगीतात रमलेला हा लूक प्रेक्षकांना ‘आशिकी’च्या मूळ थीमची आठवण करून देतो. कार्तिकसोबत कोण अभिनेत्री झळकणार आहे, हे अद्याप उघड झालेलं नाही. चित्रपटसृष्टीत चर्चा आहे की ‘पुष्पा २’ फेम श्रीलीला किंवा ‘आनंद एल राय’च्या आगामी प्रोजेक्टसाठी चर्चेत असलेली एक नवीन अभिनेत्री यात झळकू शकते. ‘आशिकी ३’ दिग्दर्शक अनुराग बासू यांच्या हातात असून, टी-सीरिज निर्मित हा चित्रपट मोठ्या प्रमाणात चर्चेत आहे. चित्रपटाच्या संगीताकडे विशेष लक्ष दिलं जात असून, प्रेक्षकांना पुन्हा एकदा गोड आणि मनाला भिडणाऱ्या गाण्यांचा आनंद लुटता येणार आहे, मात्र निर्मात्यांनी चित्रपटाच्या टायटल आणि मुख्य अभिनेत्रीबाबत अद्याप अधिकृत घोषणा केलेली नाही. त्यामुळे चाहत्यांची उत्कंठा अधिक वाढली आहे.
.................

‘सनी व्हिला’मध्ये मलायकाचं नवीन रेस्टॉरंट?

बॉलीवूड अभिनेता सनी देओल यांनी आपल्या दमदार अभिनयाने आणि ॲक्शन भूमिकांनी चाहत्यांच्या मनावर राज्य केलं आहे. ''गदर'' आणि ''बॉर्डर'' यांसारख्या सुपरहिट चित्रपटांमुळे ते लोकप्रिय झाले. दुसरीकडे मलायका अरोरा आपल्या डान्स, फॅशन आणि फिटनेससाठी प्रसिद्ध आहे, परंतु आता या दोघांची नावं एका अनोख्या कारणामुळे चर्चेत आली आहेत. सनी देओलच्या प्रॉपर्टीशी मलायका अरोराचं नाव जोडलं जात आहे! मिळालेल्या माहितीनुसार, सनी देओलच्या प्रसिद्ध ‘सनी व्हिला’मध्ये मलायका तिचं नवीन रेस्टॉरंट सुरू करणार आहे. जुहूमधील हा भव्य व्हिला अनेक बॉलीवूड सेलिब्रिटीजसाठी खास आकर्षणाचा केंद्रबिंदू राहिला आहे. सूत्रांनी दिलेल्या माहितीनुसार, मलायकाने याआधी तिच्या मुलासोबत ‘स्कारलेट हाउस’ नावाचं हेल्दी फूड कन्सेप्ट असलेलं रेस्टॉरंट सुरू केलं होतं. आता ती ‘सनी व्हिला’च्या रिकाम्या भागात नवीन आऊटलेट उघडण्याच्या तयारीत आहे. या कॅफेचं काम वेगाने सुरू असून, मार्चमध्ये याचे उद्घाटन होण्याची शक्यता आहे. हा कॅफे ‘स्कारलेट हाउस’चीच शाखा असेल की एक वेगळं ब्रँडिंग असेल, याबाबत अजून स्पष्टता नाही, पण हे ठरलंय की मलायका आता फक्त मनोरंजन विश्वात नाही, तर व्यवसायाच्या जगातही आपला ठसा उमटवण्याच्या तयारीत आहे. आता चाहत्यांना तिच्या या नवीन प्रोजेक्टची उत्सुकता लागली आहे!
.................

''केसरी चॅप्टर २'' रिलीजची नवी तारीख मिळाली!

भारतातील सर्वोच्च बॅरिस्टर सी शंकरन नायर यांच्या जीवनावर आधारित ''केसरी चॅप्टर २'' हा चित्रपट येत आहे. यामध्ये अभिनेते अक्षय कुमार, आर माधवन आणि अनन्या पांडे काम करत असून, या चित्रपटाला रिलीजची नवीन तारीख मिळाली आहे. चित्रपटाचे शीर्षक ''केसरी चॅप्टर २-द अनटोल्ड स्टोरी ऑफ जालियनवाला बाग'' असे आहे. यापूर्वी हा चित्रपट १४ मार्चला प्रदर्शित होणार होता. आता हा चित्रपट आता १८ एप्रिल रोजी प्रदर्शित होणार आहे. सी शंकरन नायर यांनी जालियनवाला बाग हत्याकांडाचे सत्य उघड करण्यासाठी ब्रिटिश राजवटीविरुद्ध लढा दिला. या चित्रपटाचे दिग्दर्शन करण सिंग त्यागी यांनी केले आहे. जालियनवाला बाग हत्याकांडाचे सत्य उघड करण्यासाठी शंकरन नायर यांनी ब्रिटिश राजवटीविरुद्ध लढलेली पौराणिक न्यायालयीन लढाई हा चित्रपट उलगडून दाखवतो. शंकरन नायर यांच्या शौर्याने देशभरात स्वातंत्र्यलढा पेटला आणि सत्यासाठी लढण्याच्या सामर्थ्याचा महत्त्वपूर्ण टप्पा आहे.
....................

अमिताभ बच्चनचे अन् जैसलमेरचा पाऊस!

बॉलीवूडचे महानायक अमिताभ बच्चन यांच्याबद्दल अनेक किस्से ऐकायला मिळतात, पण दिग्दर्शक अपूर्व लाखियाने शेअर केलेला अनुभव विशेष लक्षवेधी आहे. त्याच्या मते, जैसलमेरमध्ये दीर्घकाळ दुष्काळ पडला होता, पण अमिताभ बच्चन तिथे पोहोचताच अचानक पाऊस पडला!
दिग्दर्शक अपूर्व लाखिया म्हणाले की, जैसलमेरच्या स्थानिकांनी अमिताभ बच्चन यांना देवाच्या रूपात पाहिले, कारण त्यांच्या आगमनाने दुष्काळ संपल्याचे दिसले. एका मुलाखतीत लाखियाने सांगितले की, "आम्ही ‘मुंबई से आया मेरा दोस्त’ चित्रपटाचे शूटिंग जैसलमेरमध्ये करत होतो. त्या वेळी तिथे दुष्काळ पडला होता. अमिताभ बच्चन नवीन वर्षासाठी तिथे येत होते. जया बच्चन, श्वेता बच्चन आणि अमर सिंग यांच्यासह आम्ही कुठेतरी वाळवंटात शूटिंग करत होतो. लांबूनच त्यांचा ताफा ओळखू येत होता, कारण जैसलमेरमध्ये कोणीही एकाच वेळी इतक्या आलिशान गाड्या पाहिल्या नव्हत्या." अपूर्व पुढे म्हणाला, "बच्चन यांचा ताफा जसजसा सेटजवळ येत होता, तसतसे आकाशात काळे ढग जमू लागले. ते सेटवर पोहोचले, गाडीतून उतरले आणि अभिषेकला मिठी मारली, त्याच वेळी गारपीट सुरू झाली. पाऊस इतका झाला की नद्यांना पूर आला. त्यानंतर हॉटेलबाहेर ४० ते ५० हजार लोक जमा झाले होते. तेव्हा आणि आजही लोक त्यांच्या पाया पडतात, कारण त्यांना वाटते की ते देव आहेत." अपूर्वने स्पष्ट केले की, जरी हा योगायोग असला तरी त्याच्यासाठी हा प्रसंग विलक्षण होता. त्यानंतर त्याने २००५ मध्ये आलेल्या ‘एक अजनबी’ चित्रपटात अमिताभ बच्चन यांच्यासोबत काम केले.