शौचालयाच्या टाकीत आढळला बेपत्ता चिमुरड्याचा मृतदेह

शौचालयाच्या टाकीत आढळला बेपत्ता चिमुरड्याचा मृतदेह

भिवंडी, ता. १८ (वार्ताहर) ः भिवंडी शहरातील भादवड येथील एका इमारतीत राहणाऱ्या अडीच वर्षीय बेपत्ता झालेल्या मुलाचा मृतदेह घराशेजारीच काही अंतरावर असलेल्या शौचालयाच्या टाकीत आढळून आला. आयांश अमरजीत जयस्वाल असे त्याचे नाव आहे.
पोलिसांनी दिलेल्या माहितीनुसार, आयांश शुक्रवारी (ता. १४) सायंकाळी साडेचार वाजता घराबाहेर खेळत असताना बेपत्ता झाला होता. त्याचा परिसरात शोध घेऊनही तो न सापडल्याने त्याच्या आईने दिलेल्या तक्रारीवरून शांतीनगर पोलिस ठाण्यात अपहरणाचा गुन्हा दाखल करण्यात आला होता. त्याच परिसरात स्थानिक कुटुंबीयांसह पोलिसांकडून शोध घेतला जात असताना तो कुठेही आढळून आला नव्हता. मंगळवारी (ता. १७) दुपारी १२ वाजण्याच्या सुमारास आयांश राहत असलेल्या इमारतीपासून काही अंतरावर असलेल्या शौचालयाच्या उघड्या चेंबरच्या टाकीत त्याचा मृतदेह आढळून आला. या घटनेने परिसरात खळबळ उडाली असून, पोलिसांनी बालकाचा मृतदेह बाहेर काढून तो उत्तरीय तपासणीसाठी शासकीय रुग्णालयात रवाना केला आहे.