ठाण्यातील रिफ्लेक्टर चमकेनात

ठाण्यातील रिफ्लेक्टर चमकेनात
ठाणे शहर, ता. १८ (बातमीदार) : वाहतूक विभागाने ठाणे शहरातील रस्त्यांवर झेब्रा क्रॉसिंगजवळ रिफ्लेक्टर बसवले आहेत; मात्र बसवलेले रिफ्लेक्टर रात्रीच्या वेळी चमकत नसल्याने वाहनचालकांना रस्त्यावरील झेब्रा क्रॉसिंग दिसणे कठीण झाले आहे. परिणामी अपघातांची भीती व्यक्त केली जात आहे. ठाण्यातील बहुतांश रस्ते सिमेंट काँक्रीट झाले असल्याने वाहनांची गती वाढली आहे. त्यामुळे पादचाऱ्यांना रस्ता ओलांडणे कठीण होत आहे, असे होऊ नये यासाठी ठाणे महापालिकेकडून झेब्रा क्रॉसिंग तयार केले आहे. रात्रीच्या वेळी हे झेब्रा क्रॉसिंग अधिक स्पष्ट दिसावेत, यासाठी एमएसआरडीसीकडून येथे रिफ्लेक्टर बसवले आहेत. हे रिफ्लेक्टर रात्रीच्या वेळी दिव्याप्रमाणे चमकतात. त्यामुळे वाहनचालकांना पुढे गतिरोधक असल्याचे लक्षात येते, परंतु ठाण्यात बसवलेले रिफ्लेक्टर चमकत नसल्याने त्यांच्या गुणवत्तेवर प्रश्नचिन्ह उभे राहिले आहे.