उल्हासनगर स्थानक परिसरात दहशत!

चाकू दाखवत दहशत
पसरविण्याचा प्रयत्न
उल्हासनगर, ता. १८ ( वार्ताहर) : उल्हासनगर रेल्वे स्थानकानजीक असलेल्या एका मोबाईल दुकानाची तोडफोड करीत दुकानदाराला चाकूचा धाक दाखवित जीवे मारण्याचा प्रयत्न करण्यात आला. याप्रकरणी पाजी नामक आरोपीविरोधात विठ्ठलवाडी पोलिस ठाण्यात गुन्हा दाखल करण्यात आला आहे.
तक्रारदार मोहम्मद शाहिद झाकीर हुसेन (वय २५) याचे उल्हासनगर रेल्वे स्थानकानजीक मोबाईल दुरुस्तीचे दुकान आहे. रविवारी रात्री साडेआठ वाजण्याच्या सुमारास पाजी नामक एका व्यक्तीने दुकानात येत वाद घालण्यास सुरुवात केली. तक्रारदाराचा लहान भाऊ तौकीर (वय २२) याने मध्यस्थी करण्याचा प्रयत्न केला असता, आरोपीने चाकू दाखवित जीवे मारण्याची धमकी दिली. तसेच दुकानातील प्रिंटर मशीनची तोडफोड करीत घटनास्थळावरून पसार झाला. झाकीर हुसेन याच्या तक्रारीवरून विठ्ठलवाडी पोलिसांनी आरोपीविरोधात गुन्हा दाखल केला आहे.