अंबरनाथला जय शिवाजी - जय भारत पदयात्रा

अंबरनाथमध्ये पदयात्रा
अंबरनाथ, ता. १९ (बातमीदार) : छत्रपती शिवाजी महाराज यांच्या जयंतीनिमित्ताने अंबरनाथ नगरपालिकेच्या वतीने ''जय शिवाजी जय भारत'' पदयात्रा आयोजित केली होती. अंबरनाथ नगरपालिकेच्या कार्यालयाच्या प्रांगणात मुख्याधिकारी अभिषेक पराडकर, उपमुख्याधिकारी उमेश राऊत यांच्या हस्ते भारतरत्न डॉ. बाबासाहेब आंबेडकर, महात्मा गांधी यांच्या पुतळ्याला पुष्पहार अर्पण करून अभिवादन करण्यात आले. केंद्र सरकारच्या निर्देशानुसार छत्रपती शिवाजी महाराजांच्या जयंतीनिमित्ताने प्रशासक डॉ. प्रशांत रसाळ यांच्या मार्गदर्शनाखाली नगर परिषदेच्या वतीने शहरात ''जय शिवाजी जय भारत'' पदयात्रा आयोजित केली होती. मुख्याधिकारी पराडकर यांच्या उपस्थितीत छत्रपती शिवाजी महाराज चौक अंबरनाथ (पूर्व) येथून हुतात्मा चौक, रेल्वे ओव्हर ब्रिजमार्गे, मटका चौक, कल्याण-बदलापूर रोडमार्गे महात्मा गांधी विद्यालयपर्यंत ''जय शिवाजी जय भारत'' पदयात्रा काढण्यात आली.