जेवणाच्या वादातून मैत्रिणीची आत्महत्या

जेवणाच्या वादातून मैत्रिणीची आत्महत्या
सकाळ वृत्तसेवा
डोंबिवली, ता. १९ : स्वयंपाक बनविणे तसेच मित्राच्या कपड्यावर तेलाचे डाग पडल्याच्या कारणावरून दोघा मित्र-मैत्रिणींचा वाद झाला. यावरून रागाच्या भरात मैत्रिणीने राहत्या घरात गळफास घेत आत्महत्या केल्याची घटना सोमवारी (ता. १७) घडली. मानसी संतोष नवघने (वय २२) असे मृत महिलेचे नाव आहे. मानसीच्या ३० वर्षीय नोकरदार मित्राने दिलेल्या माहितीनुसार, टिळकनगर पोलिसांनी या घटनेची नोंद करून तपास सुरू केला आहे.
टिळकनगर पोलिसांनी दिलेल्या माहितीनुसार, ठाकुर्लीजवळील खंबाळपाडा परिसरात मानसी आणि तिचा ३० वर्षीय मित्र लिव्ह इन रिलेनशिपमध्ये राहत होते. दोघांनीही लग्न करण्याचा निर्णय घेतला होता. जेवण बनविण्यावरून दोघांमध्ये वाद झाले होते. यात मित्राने बाहेरून जेवण घेतले, त्या जेवणाचे डाग त्याच्या कपड्याला लागले होते. यावरून त्या दोघांमध्ये पुन्हा भांडण झाले. याच रागाच्या भरात मानसीने राहत्या घरात गळफास घेत आत्महत्या केली. मित्राच्या हा प्रकार लक्षात आल्यावर त्याने तिला तातडीने केडीएमसीच्या शास्त्रीनगर रुग्णालयात नेले. डॉक्टरांनी तिला तपासून मृत घोषित केले. टिळकनगर पोलिसांनी घटनास्थळाचा पंचनामा करून मानसीचा मृतदेह तपासणीसाठी शास्त्रीनगर रुग्णालयात दिला. यासंदर्भात पोलिस अधिक तपास करीत आहेत.