आंबेडकरी चळवळीतील गीतकार प्रभाकर पोखरीकर यांचे निधन

आंबेडकरी चळवळीतील गीतकार प्रभाकर पोखरीकर यांचे निधन

चेंबूर, ता. २४ (बातमीदार) ः आंबेडकरी चळवळीतील ज्येष्ठ गीतकार, गायक प्रभाकर पोखरीकर यांचे अल्पश: आजाराने सोमवारी (ता. २४) पहाटे ५ वाजण्याच्या सुमारास निधन झाले. त्यांनी ८८व्या वर्षी शेवटचा श्वास घेतला.
पोखरीकर यांची ‘छाती ठोकून सांगू जगाला असा भीमराव होणार नाही’, ‘जीवाला जीवाचं दान माझ्या भीमाने केलं’ अशी एकापेक्षा एक गीते प्रसिद्ध आहेत. भारतीय संविधानाचे निर्माते महामानव डॉ. बाबासाहेब आंबेडकर यांच्या जयंतीनिमित्त त्यांना राज्य सरकारच्या वतीने डॉ. बाबासाहेब आंबेडकर समाजभूषण पुरस्कार देऊन सन्मानित करण्यात आले होते. महामानव डॉ. बाबासाहेब आंबेडकर यांचे कार्य आणि विचार जनसामान्यांपर्यंत पोहोचवण्याचे काम त्यांनी शेवटच्या श्वासापर्यंत केले. दिघा येथे नातेवाइकांकडे त्यांचे वास्तव्य होते. दादर येथील स्मशानभूमीत संध्याकाळी त्यांच्या पार्थिवावर अंत्यसंस्कार करण्यात आले.