ज्वेल्स ऑफ नवी मुंबई येथील मोकळ्या भूखंडावर कचऱ्याचे ढीग

ज्वेल्स ऑफ नवी मुंबईतील मोकळ्या भूखंडावर कचऱ्याचे ढीग
नेरूळ, ता. २५ (बातमीदार) ः ज्वेल्स ऑफ नवी मुंबई म्‍हणून संबोधल्या जाणाऱ्या पाचबीच मार्गावरील सेक्टर २८ येथील मोकळ्या भूखंडाचा कचराकुंडीप्रमाणे उपयोग केला जात आहे. कचऱ्याच्या ढिगामुळे परिसरात दुर्गंधी पसरत आहे. कचरा उचलण्याऐवजी ठरावीक दिवसांनी तो पेटवून दिला जात आहे. त्‍यामुळे या धुराचाही त्रास स्‍थानिकांना होत असल्याने नाराजी व्‍यक्‍त करण्यात येत आहे.
स्वच्छतेसाठी महापालिकेने शहरभर विशेष अभियान राबविले आहे. विविध उपक्रम राबवून शहर स्वच्छ ठेवण्यासाठी प्रयत्न केला जात आहे; परंतु काही ठिकाणी नागरिक नियमांचे पालन न करता जागा मिळेल त्या ठिकाणी कचरा टाकत आहेत. यामुळे शहराला विद्रूपीकरण येत असून परिसर अस्‍वच्‍छ होत आहे. नेरूळ सेक्टर २८ येथील रेणुका देवी इमारतीपासून ते सीवूड्सच्‍या दिशेने जाणाऱ्या रस्त्यावरील भूखंडावर मोठ्या प्रमाणात कचरा टाकण्यात येत आहे. रोज सकाळ व सायंकाळी ज्वेल्स ऑफ नवी मुंबई येथे फेरफटका मारण्यासाठी जाणारे नागरिक कचरा पाहून नाराजी व्यक्त करीत आहेत. रोगराई पसरू नये, यासाठी येथे त्वरित सफाई करावी, तसेच या ठिकाणी कचरा टाकणाऱ्यांवर कारवाई करण्यात यावी, अशी मागणी स्वराज्य पक्षाचे नेरूळ तालुकाध्यक्ष गणेश माने यांनी केली आहे. विशेष म्‍हणजे, पालिकेकडून येथील कचरा उचलण्याऐवजी जाळून टाकण्यात येत असल्याने परिसरात धुराचे लोट पसरत आहेत.