चोरीस गेलेले ३०० मोबाईल केले परत

चोरीला गेलेले ३०० मोबाईल केले परत
घाटकोपर पोलिसांची कारवाई
घाटकोपर, ता. ४ (बातमीदार) ः चोरीला गेलेल्या आणि हरवलेल्‍या ३०० मोबाईल फोनचा तपास लावण्यात घाटकोपर पोलिस पथकाला यश आले आहे. मुंबई गुजरात, उत्तर प्रदेश, झारखंड, बिहार, पश्चिम बंगाल आदी राज्यांतून हे मोबाईल शोधून काढण्यात आले.
एकूण ३७ लाख ७३ हजार किमतीच्या ३०० मोबाईलचा शोध घेण्यात या पथकाला यश आले. २०२३ ते आतापर्यंत गहाळ, चोरी झालेल्या विविध प्रकरणांतील या फोनचा समावेश असल्याचे पोलिसांनी सांगितले. पोलिस उपायुक्त विजयकांत सागर, घाटकोपर पोलिस ठाण्याचे वरिष्ठ पोलिस निरीक्षक अविनाश काळदाते, पोलिस निरीक्षक (गुन्हे) दीपाली कुलकर्णी यांच्या मार्गदर्शनाखाली मोबाईल चोरी व मोटार वाहन चोरी प्रतिबंधक पथकाचे उपनिरीक्षक पांडुरंग साळुंखे, दीपक भारती, नीलेश पवार, अमोल सूर्यवंशी, अजय अहिरे, बाळासाहेब गव्हाणे आणि अंमलदार यांनी ही कामगिरी केली आहे.

पोलिसांचे मानले आभार
घाटकोपर एलबीएस मार्गावरील पाटीदार हॉलमध्ये नुकतेच उपायुक्तांच्या उपस्थितीत एका कार्यक्रमात तक्रारदारांना त्यांचे फोन परत करण्यात आले आहेत. आपले हरवलेले तसेच चोरीला गेलेले मोबाईल फोन पुन्हा हाती आल्याने अनेकांनी सुटकेचा निःश्वास टाकत पोलिसांचे आभार मानले.