अपघातानंतर ट्रक व ट्रेलरला भीषण आग

अपघातानंतर ट्रक व ट्रेलरला आग
मुंबई अहमदाबाद महामार्गावर मोठी वाहतूक कोंडी
मनोर, ता. ४ (बातमीदार) ः मुंबई अहमदाबाद महामार्गावर वैतरणा नदीच्या परिसरात ट्रक आणि ट्रेलरचा मंगळवारी पहाटे एक वाजता अपघात झाल्यानंतर दोन्ही वाहनांना भीषण आग लागली. सुदैवाने या घटनेत कोणतीही जीवितहानी झाली नाही, परंतु अपघातामुळे महामार्गावर मोठी वाहतूक कोंडी झाली होती.
मुंबईहून गुजरातच्या दिशेने सिमेंट घेऊन जाणाऱ्या ट्रेलरचालकाचे वैतरणा नदी पुलाच्या परिसरात नियंत्रण सुटल्याने तो दुभाजक ओलांडून विरुद्ध दिशेने येणाऱ्या ट्रकला जाऊन धडकला. या धडकेनंतर दोन्ही वाहनांना आग लागल्याने महामार्गावर वाहतूक कोंडी झाली होती. घटनेची माहिती मिळाल्यानंतर पोलिस आणि अग्निशमन दलाचे जवान घटनास्थळी दाखल झाले. त्यांनी आगीवर नियंत्रण मिळवत अपघातग्रस्त वाहने क्रेनच्या साह्याने महामार्गावरून हटविली. पहाटे पाच वाजण्याच्या सुमारास महामार्गावरील वाहतूक सुरळीत झाली.