बुद्धगया महाबोधी महाविहारसाठी कल्याणमध्ये मोर्चा

बुद्धगया महाबोधी महाविहारसाठी कल्याणमध्ये मोर्चा
कल्याण, ता. ९ (बातमीदार) : बिहारमधील महाबोधी महाविहार बौद्ध समाजाच्या हाती सुपूर्द करण्यात यावे, अशी प्रमुख मागणी बौद्ध भिक्षू संघाने केंद्र सरकारसह बिहार सरकारकडे केली आहे. या मागणीसाठी बौद्ध संघाच्या वतीने कल्याणमध्ये मोर्चा काढण्यात आला होता. बुद्धगया महाबोधी महाविहार हे बौद्ध धर्मीयांचे सर्वोच्च श्रद्धास्थान आहे. हे बुद्धगया महाबोधी महाविहार हे बौद्ध भिक्षू संघाच्या ताब्यात देण्यात यावे, या प्रमुख मागणीसाठी जगभरातील बौद्ध अनुयायांनी बुद्धगया येथे सध्या आंदोलन सुरू केले आहे. या आंदोलनाला पाठिंबा दर्शविण्यासाठी बुद्धभूमी फाउंडेशन व सर्व समविचारी संघटनांमार्फत संयुक्त विद्यमाने शनिवारी (ता. ८) कल्याणमध्ये मोर्चा काढण्यात आला.

कल्याण पश्चिमेतील डॉ. बाबासाहेब आंबेडकर उद्यानातून दुपारी निघालेला हा मोर्चा छत्रपती शिवाजी महाराज चौकातून तहसीलदार कार्यालयावर धडकला. या वेळी तहसीलदार कार्यालयात मागण्यांचे निवेदन देण्यात आले. या निवेदनानुसार बुद्धगया टेम्पल ॲक्ट कलम १९४९ रद्द करावे आणि ब्राह्मणी पंडे पुरोहितांच्या हस्तक्षेपावर बंदी घालावी, बौद्धांच्या भावना दुखावणाऱ्या पुरोहितांवर कायदेशीर कारवाई करावी. महाबोधी महाविहार येथे केवळ बौद्ध धम्मानुसार धार्मिक विधी पार पाडले जावेत, अशा त्यांच्या प्रमुख मागण्या आहेत. या वेळी बुद्धभूमी फाउंडेशनचे संस्थापक अध्यक्ष भंते गौतमरत्न महाथेरो, भंते प्रियरत्न थेरो, भंते शक्यरत्न थेरो, भंते तुशीतरत्न थेरो, भंते विनयरत्न, भंते इंद्ररत्न, भंते यामरत्न, भंते नंदरत्न, भंते शिलरत्न यांच्या प्रमुख उपस्थित मोर्चा पार पडला.