उपसरपंचपदी अंकुश सातपुतेंची निवड

किन्हवली (बातमीदार)ः शहापूर तालुक्यातील अस्नोली ग्रामपंचायतीत होतकरू तरुणांना नेतृत्वाची संधी मिळावी, या उद्देशाने उपसरपंच अर्जुन दिनकर यांनी राजीनामा दिला होता. त्यांच्या जागी उपसरपंचपदी अंकुश सातपुते यांची बिनविरोध निवड झाली आहे. सरपंच विष्णू देसले यांच्या अध्यक्षतेखाली झालेल्या निवडणुकीत उपसरपंचपदासाठी अंकुश सातपुते यांचा एकमेव अर्ज आला होता. त्यामुळे निवडणूक अधिकारी अमोल ओंकारेश्वर यांनी सातपुते यांची उपसरपंचपदी निवड झाल्याची घोषणा केली. या वेळी माजी आमदार पांडुरंग बरोरा, माजी जि.प. सदस्य राजेंद्र विशे, उद्योजक अविनाश साबळे, नामदेव गिरा, खरेदी-विक्री संघाचे माजी सभापती दत्तात्रय दिनकर आदी उपस्थित होते.