पोटच्या मुलीवर वडिलांचा अत्याचार

टिटवाळ्यात पोटच्या मुलीवर
वडिलांचा अत्याचार
टिटवाळा, ता. ९ (वार्ताहर) : वडिलांनीच आपल्या मुलीवर सहा वर्षे अत्याचार केल्याचा प्रकार टिटवाळा येथे उघडकीस आला आहे. नात्याला काळिमा फासणाऱ्या प्रकारामुळे खळबळ उडाली आहे. टिटवाळा पोलिसांनी नराधमाला अटक केली आहे. आरोपी हा रेल्वेमध्ये उच्चपदावर कार्यरत असल्याची माहिती मिळत आहे. याप्रकरणी पुढील तपास सुरू असल्याचे पोलिसांनी सांगितले.
पीडित मुलगी वयाच्या १६ व्‍या वर्षांपासून या नरकयातना सहन करत होती. पत्नी आणि मुलीला सातत्याने मारहाण करून जीवे मारण्याच्या धमकीने हा अत्याचार सुरू होता. या मुलीवरील सुरू असलेल्या या अत्याचाराची माहिती एका सामाजिक संस्थेत काम करणाऱ्या कार्यकर्तीकडे पोहोचताच तिने या प्रकरणाला वाचा फोडली. तिच्या मदतीने टिटवाळा पोलिस ठाण्यात तक्रार दाखल होताच पोलिसांनी गुन्हा दाखल केला. या विकृताला पोलिसांनी शनिवारी रात्री ११ वाजता अटक केली. आरोपी हा रेल्वेतील उच्चपदस्थ अधिकारी आहे. या घटनेमुळे परिसरात संतापाची लाट उसळली आहे. मुलगी आणि बापाच्या नात्याला काळिमा फासणाऱ्या या आरोपीला कठोरातील कठोर शिक्षा देण्यात यावी, अशी मागणी केली जात आहे.