दृष्टिहीन मुलांसाठी विशेष होळी उत्सव

दृष्टिहीन मुलांसाठी विशेष होळी उत्सव
आधारिका फाउंडेशनचा पुढाकार
सकाळ वृत्तसेवा
मुंबई, ता. १२ : होळी सणाच्या रंगांच्या उधळणीत दृष्टिहीन मुलांनाही सहभागी होता यावे, यासाठी मुंबईच्या आधारिका फाउंडेशनने पुढाकार घेतला असून त्यांच्यासाठी विशेष होळी उत्सवाचे आयोजन केले आहे. त्यांच्या आयुष्यातला अंधकार दूर करता येत नसला तरी ते पर्यावरणपूरक आणि सर्वसामान्यांसारखी होळी साजरी करू शकतात, हाच या उत्सवाचा उद्देश आहे.
मुंबईत पहिल्यांदाच दिव्यदृष्टी मित्रांसाठी विशेष होळी उत्सवाचे आयोजन करण्यात आले आहे. हा उत्सव धूलिवंदनाच्या दिवशी दादरच्या छत्रपती शिवाजी महाराज पार्क येथे पार पडणार आहे. सुरक्षित वातावरणात हा सोहळा पार पडावा, यासाठी विशेष सोय करण्यात येणार आहे. सेंद्रिय रंग, सुरक्षित, पर्यावरणपूरक आणि स्पर्शाद्वारे अनुभवण्यासारखे रंग, पिचकारी, संगीताच्या तालावर ऊर्जा आणि उत्साह अनुभवण्यासाठी डीजे बॅश, पाणी फवारणी, सुरक्षिततेची विशेष काळजी म्हणून सुरक्षा गॉगल्स ठेवले जाणार आहेत.
होळी हा केवळ रंगांचा सण नसून समतेचा, आनंदाचा आणि एकत्रिततेचा सण आहे, असे आधारिका फाउंडेशनचे संस्थापक विनायक मोरे यांनी सांगितले.