विक्रमगड पोलिसांकडून महिलांना मार्गदर्शन

विक्रमगड (बातमीदार) : जनसंवाद अभियानअंतर्गत आणि सावित्रीबाई फुले यांच्या स्मृतिदिनानिमित्त विक्रमगड पोलिस ठाणे येथे महिला मेळाव्याचे आयोजन करण्यात आले होते. या मेळाव्यास विक्रमगड तहसीलदार चारुशीला पवार, विक्रमगड पोलिस ठाण्याचे प्रभारी अधिकारी रवींद्र पारखे, महिला दक्षता समिती अध्यक्षा सरस्वती नडगे-भोये आदी मान्यवर उपस्थित होते. पोलिस निरीक्षक रवींद्र पारखे हे महिलांना मार्गदर्शन करताना म्हणाले, की पालघर जिल्ह्यातील महिलांचे मनोबल वाढवण्यासाठी व त्यांना स्वावलंबी बनवण्यासाठी जनसंवाद अभियानांतर्गत महिला मेळाव्याचे आयोजन करण्यात येत आहे. त्याअंतर्गत अल्पवयीन मुलींचे विवाह रोखण्यासाठी समुपदेशन, कौटुंबिक हिंसाचाराबाबत मार्गदर्शन, सायबर गुन्ह्यांबाबत जागृती, महिला अत्याचारासंबंधीचे कायदे याबाबत मार्गदर्शन, महिला बचत गट व करिअर मार्गदर्शन, महिला सुरक्षा आणि कौशल्य विकास आदी मार्गदर्शन करण्यात येते. चारुशीला पवार यांनी उपस्थित महिलांना मोलाचे मार्गदर्शन केले.