मिरा-भाईंदरमधील पदभरतीसाठी गती मिळणार

भाईंदर, ता. १७ (बातमीदार) : मिरा-भाईंदर महापालिकेतील पदभरतीसाठी आता ‘टीसीएस’ या कंपनीची नियुक्ती करण्यात आली आहे. याआधी ही भरती करण्यासाठी ‘आयबीपीएस’ कंपनीची नियुक्ती करण्यात आली होती, परंतु पदभरती प्रक्रियेत कंपनीकडून महापालिकेला योग्य तो प्रतिसाद मिळत नसल्याने त्यांची नियुक्ती रद्द करून आता ‘टीसीएस’ची नियुक्ती करण्यात आली आहे. त्यामुळे गेले अनेक महिने रखडलेल्या भरती प्रक्रियेला वेग येणार आहे.

महापालिकेत रिक्त असलेल्या विविध ३४० पदांची भरती करायची आहे. त्यापैकी पहिल्या टप्प्यात कनिष्ठ अभियंता, लिपिक, सर्व्हेअर व प्लंबर आदी ४५ पदे भरण्याचा निर्णय महापालिकेने घेतला आहे. राज्य सरकारच्या आदेशानुसार पदभरतीसाठी ‘टीसीएस’ अथवा ‘आयबीपीएस’ या कंपनीची नियुक्ती करणे आवश्यक आहे. त्यानुसार महापालिकेने गेल्या वर्षी सप्टेंबरमध्ये ‘आयबीपीएस’ या कंपनीची निवड करून त्यांना ४५ पदे भरण्याबाबतचा मसुदा पाठविण्यात आला. भरती प्रक्रिया तातडीने सुरू करण्याबाबत महापालिकेकडून कंपनीकडे वारंवार पाठपुरावा करण्यात आला, मात्र कंपनीकडून पुरेसा प्रतिसाद देण्यात आला नाही. त्यामुळे भरती प्रक्रिया लांबणीवर पडत गेली.

पदभरतीची प्रक्रिया जाणून घेण्यासाठी महापालिका अधिकाऱ्यांनी गेल्या महिन्यात पनवेल महापालिकेला भेट दिली. त्या महापालिकेने भरती प्रक्रिया राबविण्यासाठी टीसीएस कंपनीची नियुक्ती केली असून, भरती प्रक्रिया पूर्ण केली. निवड झालेले कर्मचारी, अधिकारी कामावर हजरदेखील झाल्याचे निदर्शनास आले. पनवेल पालिकेने ‘टीसीएस’सोबत केलेल्या करारनाम्यात महापालिका व कंपनीची जबाबदारी निश्चित केली होती. त्यामुळे भरती प्रक्रिया जलद गतीने पूर्ण झाल्याचे स्पष्ट झाले.

करारनाम्यात तफावत
मिरा-भाईंदर महापालिकेने ‘आयबीपीएस’सोबत भरती प्रक्रियेसाठीच्या सामंजस्य करारनाम्याचा मसुदा तपासला असता त्यात आणि पनवेल महापालिकेने केलेल्या करारनाम्यात बऱ्याच बाबींमध्ये तफावत दिसून आली. त्यामुळे महापालिकेने करारनाम्यात बदल करण्यासाठी कंपनीशी संपर्क साधला, मात्र कंपनीकडून कोणताही प्रतिसाद मिळाला नाही.

ठरावाला मंजुरी
‘टीसीएस’ने पनवेल महापालिकेची पदभरती यशस्वीरित्या पूर्ण केल्याने अखेर महापालिकेने ‘टीसीएस’ची निवड करण्याचा निर्णय घेतला. ‘आयबीपीएस’सोबत महापालिकेचा सामंजस्य करारनामा झाला नसल्यामुळे अखेर त्याजागी ‘टीसीएस’ची नियुक्ती करण्याचा ठराव नुकताच मंजूर केला आहे.