अग्नी सुरक्षेसाठी गुरखा वाहने

पालघर, ता. १८ (बातमीदार) : राज्य आपत्ती व्यवस्थापन विभागाकडून जिल्हा आपत्ती व्यवस्थापन प्राधिकरणाचे बळकटीकरण करण्यासाठी पालघर आणि डहाणू नगर परिषदेकरिता मिनी गुरखा वाहने प्राप्त झाली आहेत. या वाहनांचे लोकार्पण जिल्हाधिकारी गोविंद बोडके यांचे हस्ते सोमवारी (ता. १७) करण्यात आले. या वेळी पोलिस अधीक्षक बाळासाहेब पाटील, निवासी उपजिल्हाधिकारी सुभाष भागडे, जिल्हा आपत्ती व्यवस्थापन अधिकारी विवेकानंद कदम, पालघर व डहाणू नगर परिषदेचे मुख्याधिकारी, अग्निशमन विभागाचे अधिकारी कर्मचारी उपस्थित होते. गाडीचा उपयोग छोट्या प्रकारच्या आग विझवण्यासाठी होणार आहे. अतिमहत्त्वाच्या व्यक्तींचा ताफा, तसेच शोध व बचाव कार्यासाठी, वाहन अपघातात बचावासाठी मदत होणार आहे.

आधुनिक सुविधा
२० टनापर्यंत वजनाची गाडी लिफ्ट करण्यासाठी स्टेपनी असून ५० लिटर फोमच्या साह्याने केमिकल आग विझवण्यात येते, तसेच ३०० लिटर पाणी क्षमतेचे अतिउच्च दाबाची टाकी असून, सतत २० मिनिटे फवारा करू शकतो, अशा विविध वैशिष्ट्यापूर्ण गुरखा गाड्या प्राप्त झालेल्या आहेत. तसेच अग्निसुरक्षेसाठी उच्च गुणवत्तेचे गणवेशही देण्यात आले आहेत.