नवी मुंबईत भव्य शिवजयंती सोहळा

नवी मुंबईत भव्य शिवजयंती सोहळा
तुर्भे, ता. १८ (बातमीदार) : शिवबा मित्र मंडळ आणि सानपाडा युवा सामाजिक संस्था यांच्या वतीने शिवसेना शाखा सानपाडा गाव येथे शिवजन्मोत्सव सोहळा उत्साहात साजरा करण्यात आला.
या सोहळ्याच्या निमित्ताने सकाळी रक्तदान, नेत्रचिकित्सा शिबिर आयोजित करण्यात आले होते. त्‍यानंतर शिवप्रतिमा पूजन, सत्यनारायण महापूजा, भव्य मिरवणूक, महाप्रसाद आयोजित करण्यात आला होता, अशी माहिती माजी नगरसेवक सोमनाथ वास्कर यांनी दिली, तर राजे शिवाजी उत्सव मंडळ यांच्या वतीने एपीएमसी फळ मार्केटमध्ये भव्य शिवजयंती सोहळा आयोजित करण्यात आला होता.
यामध्ये सकाळी १० वाजता ढोल-ताशांच्या गजरात भव्य मिरवणूक काढण्यात आली. यामध्ये छत्रपती शिवाजी महाराजांची प्रतिकृती स्थापन करून शिवकालीन चलचित्र, घोड्यावरून महाराजांची आणि मावळ्यांची भव्य मिरवणूक, शिवकालीन खेळ, शिवकालीन देखावे साकारण्यात आले होते. त्याचप्रमाणे शिवरायांचा भगवा झंझावात म्हणून मार्केटमध्ये कार्यक्रमाच्या ठिकाणी १८ फूट उंच ज्योतिबा देवाचा देखावा, २४ फूट उंच केदारनाथ मंदिर आणि रायगड आदींचा देखावादेखील साकारण्यात आला होता. या वेळी दुपारी शिवभंडारा (अन्नदान), सायंकाळी मराठी व हिंदी गाण्यांचा रेकॉर्ड डान्स कार्यक्रम झाला, तर तुर्भे सेक्टर २० मधील शिवप्रेमी मित्र मंडळातर्फे, शिवज्योत रॅलीचे आयोजन केले होते.
....................
कामोठे येथे एक शहर, एक शिवजयंती साजरी
कामोठे, ता. १८ (बातमीदार) : कामोठे येथे सकल हिंदू उत्सव समितीच्या वतीने तिथीनुसार एक शहर, एक शिवजयंती साजरी करण्यात आली. या कार्यक्रमात कामोठ्यातील शेकडो शिवप्रेमी सहभागी झाले होते. सकल हिंदू उत्सव समितीच्या वतीने शिवजयंती साजरी करण्याचे यंदाचे चौथे वर्ष होते. कामोठे पोलिस ठाण्याच्या समोरील चौकात सोमवारी या कार्यक्रमाचे आयोजन करण्यात आले होते. या वेळी शाहीर यशवंत जाधव आणि त्यांच्या सहकाऱ्यांनी शिवचरित्र सादर केले. या व्यतिरिक्त भजनी मंडळ, लाठीकाठी, तलवारबाजी पथक, शस्त्रपथक, हिरकणी लेझीम पथक व बोथाडी पथक यांच्या प्रात्यक्षिकाने उपस्थितांची मने जिंकली. या कार्यक्रमाच्या निमित्ताने आयोजकांनी संस्कृती आणि परंपरा जतन करण्याचा प्रयत्न केला.