अखंड हरीनाम सप्ताहाची लगबग

वासिंद, ता.२३ (बातमीदार): गावात होणाऱ्या अखंड हरिनाम सप्ताहानिमित्त तयारीला वेग आला आहे. भव्यदिव्य अशा विठ्ठल रखुमाईच्या देखाव्यासह सात दिवस चालणाऱ्या सप्ताहात काकड आरती, प्रवचन, हरिपाठ, ग्रंथराज ज्ञानेश्वरी पारायणामुळे हरिभक्तांमध्ये उत्साह संचारला आहे.
गुढीपाडव्याच्या शुभ मुहूर्तावर होणाऱ्या अखंड हरिनाम सप्ताहाच्या कार्यालयाचे नुकतेच उदघाटन करण्यात आले. शहापूर तालुक्यातील सर्वाधिक भाविक या सप्ताहाला भेट देतात. प्रत्येक भाविकांची बैठक व्यवस्था व भोजनाची व्यवस्था काटेकोरपणे केली जाते. लोकवर्गणीतून साजरा होणाऱ्या या सप्ताहात गुढीपाडव्याच्या शुभ मुहूर्तावर ज्ञानेश्वर माउलींच्या मूर्तीची प्राणप्रतिष्ठापना करण्यात येते. सप्ताहाच्या सांगतेला शाळकरी मुलं, महिला डोक्यावर तुळशी कलश घेऊन मिरवणुकीत सहभागी होतात. भक्तीरसात तल्लीन वारकरी फुगड्या खेळत आनंदोत्सव साजरा करतात.
----------------------------------
४६ वर्षांपासून एकोप्याचे प्रतीक
दीपज्योतीच्या कार्यक्रमाला महाराष्ट्रातील संत साहित्याचा अभ्यास असलेल्या प्रसिद्ध हरिभक्त परायण बाबा महाराज सातारकर, रामायणाचार्य ढोक महाराज, प्रमोद महाराज जगताप यांची कीर्तनरूपी सेवा लाभलेली आहे. यंदा देवाची आळंदी येथील भागवताचार्य महाराष्ट्ररत्न हभप आत्माराम महाराज शास्त्री यांचे काल्याचे कीर्तन होणार आहे. या सोहळ्याला महाराष्ट्रातील नामवंत कीर्तनकार येत असल्याने वासिंद परिसरातील ग्रामस्थांमधील एकोप्याचे दर्शन होते.