आर्टिफिशियल इंटेलिजन्सवर कार्यशाळा

कल्याण, ता. २५ (बातमीदार) : अत्याधुनिक आर्टिफिशियल इंटेलिजन्स साधनांची कार्यशाळा (एआय) ही साकेत कॉलेज ऑफ एज्युकेशन यांच्या कल्याण येथील साकेत कॅम्पस येथे खासगी विनाअनुदानित शाळा व्यवस्थापन संघटना (पुस्मा) यांच्या सहकार्याने सोमवारी (ता. २४) पार पडली. या कार्यशाळेत ६०हून अधिक शाळांचे विश्वस्त, मुख्याध्यापक, प्रशासक सहभागी झाले होते. यावेळी पुस्मा संघटनेच्या अध्यक्षा डॉ. अर्चना रॉड्रिग्ज, साकेत ज्ञानपीठचे सचिव साकेत तिवारी, पुस्माचे सचिव डोमिनिक पॉल, भरत मलिक, ॲड. अशोक साळवे आणि अजित बालन उपस्थित होते.
डॉ. अर्चना रॉड्रिग्ज यांनी आजच्या शैक्षणिक वातावरणात आर्टिफिशियल इंटेलिजन्सची वाढती भूमिका आणि विद्यार्थ्यांकडून तंत्रज्ञानाचा जलद अवलंब यावर भर दिला. तर, साकेत तिवारी यांनी शिक्षकांनी एआय साधने आणि तंत्रज्ञानाचा वापर करण्याची गरज यावर भर देण्याचा सल्ला दिला. या वेळी कल्याण-डोंबिवली महापालिकेचे उपायुक्त संजय जाधव यांनी विविध क्षेत्रांत सुरू असलेल्या परिवर्तनांवर आपले मत मांडले. या वेळी मुंबई विद्यापीठाचे असोसिएट डीन (आंतरविद्याशाखीय) डॉ. सी. ए. चक्रदेव यांनी भविष्यात विद्यार्थ्यांना तयार करण्यासाठी शैक्षणिक संस्थांनी त्यांच्या अभ्यासक्रमात एआयचा समावेश करण्याची गरज व्यक्त केली.