अंबरनाथला नववर्ष स्वागतयात्रेचे आयोजन

अंबरनाथ, ता. २७ (बातमीदार) : गुढीपाडव्यानिमित्ताने अनेक वर्षांपासून निघणारी नववर्ष स्वागतयात्रा अंबरनाथमध्ये यंदाही जल्लोषात निघणार आहे. भारतीय नववर्ष स्वागतयात्रा समितीच्या वतीने २३ वर्षांपासून शहरामध्ये नववर्षाला स्वागतयात्रा काढण्यात येते. यंदा समितीच्या अध्यक्षा सरिता चौधरी यांच्या नेतृत्वाखाली उपाध्यक्षा पूजा जाधव आणि कार्यवाह प्रमोद नाटेकर; तसेच विविध पदाधिकाऱ्यांच्या उपस्थितीमध्ये रविवारी (ता. २३) अंबरनाथमध्ये स्वागतयात्रा काढण्यात येणार आहे. पूर्वेकडील खेर विभागातील हेरंब मंदिरातून यात्रेला रविवारी (ता. ३०) सकाळी ७.३० वाजता सुरुवात होणार आहे. छत्रपती शिवाजी महाराज चौकात शिवरायांना वंदन करून सकाळी १०.३० वाजता हुतात्मा चौकात यात्रेची समाप्ती होईल. विविध समाजाच्या संस्कृतीचे जतन करण्याबरोबरच सामाजिक संदेश यात्रेद्वारे दिला जाणार आहे. यात्रेमध्ये शहरातील विविध भजनी मंडळे, शैक्षणिक, सामाजिक संस्था, नृत्य आणि लेझीम पथकांच्या ढोल-ताश्यांच्या गजरात उत्साही वातावरणात स्वागतयात्रा काढण्यात येणार आहे.