पेणमध्ये हुंड्यासाठी विवाहितेचा छळ

पेण, ता. ३० (वार्ताहर) : माहेरहून पैसे व दागिने आणण्यासाठी पतीसह सासरच्या मंडळींनी वारंवार तगादा लावत मानसिक व शारीरिक छळ केल्‍याची तक्रार पेणमधील विवाहिता प्रज्ञा अमर पाटील यांनी शनिवारी (ता. २९) पेण पोलिस ठाण्यात केली आहे.
प्रज्ञा यांचा विवाह पेणमधील उद्योजक सूर्यकांत ऊर्फ सुरेश जोमा पाटील यांचा मुलगा अमर यांच्याशी २०१३ मध्ये झाला आहे. अमर यांचा हॉटेल, ट्रान्सपोर्टचा व्यवसाय असून, भांडवल कमी पडू लागल्यानंतर त्यांनी माहेरून ५० लाख व कारची मागणी करीत प्रज्ञा यांना मानसिक व शारीरिक त्रास देण्यास सुरुवात केली. इतकेच नव्हे तर प्रज्ञा यांच्या वडिलांना मुलीला मारण्याची धमकी देत पैशासाठी तगादा लावला. प्रज्ञा यांच्या वडिलांनी नातेवाउकांकडून उसने पैसे घेऊन रोख २३ लाख रुपये व आपल्‍याकडील ३० तोळे एप्रिल २०२२ मध्ये अमर यांना दिले. हे पैसे व्याजाने देत अमर यांनी अनेकांची फसवणूक केली आहे. अमर यांचे विवाहबाह्य संबंध असल्‍याचेही प्रज्ञा यांनी पेण पोलिस ठाण्यात दाखल केलेल्‍या तक्रारीत म्‍हटले आहे. बुधवारी (ता. २६) रात्री सासरे सुरेश पाटील यांनी चरित्र्यावर संशय घेत माहेरून पैसे आणले नाही, तर घराबाहेर काढण्याची धमकी दिली, तर पती अमरने बंदूक लावून जीवे मारण्याची धमकी देत लाथा-बुक्क्याने मारहाण केली. प्रज्ञा यांनी शुक्रवारी (ता. २८) पेण पोलिस ठाण्यात सासरे सुरेश पाटील, पती अमर, सासू लक्ष्मी, दीर भरत, जाऊ रचना, नणंद हर्षदा राहुल पाटील यांच्याविरोधात तक्रारी दाखल केली आहे. त्‍यानुसार शनिवारी पोलिसांनी गुन्हा दाखल केला आहे.

१४ दिवसांत तपास
गतवर्षीही प्रज्ञा अमर पाटील यांनी सासरच्या जाचाला कंटाळून पोलिस ठाण्यात तक्रार दाखल केली होती. आता दिलेल्‍या तक्रारीवरून १४ दिवसांत तपास करण्यात येणार असून, पाच जणांवर गुन्हा नोंदवला असून, त्‍यांच्यावर कायदेशीर कारवाई करण्यात येणार असल्‍याचे पोलिस निरीक्षक संदीप बागूल यांनी सांगितले.