पालघरमध्ये जल्लोषात नववर्षाचे स्वागत

पालघर, ता. ३० (बातमीदार) : हिंदू नववर्षाच्या स्वागतासाठी पहाटेची भक्तिगीते आणि छत्रपती शिवाजी महाराज यांच्यावर गायलेल्या पोवाड्याने पालघर शहर मंत्रमुग्ध झाले होते. यानंतर गुढीपाडव्यानिमित्त पालघर शहरात शोभायात्रा काढण्यात आली.

पालघर येथील लक्ष्मीनारायण मंदिर परिसरात सूर पहाटेचे या कार्यक्रमाचे आयोजन संस्कार भारती यांनी केले होते. या कार्यक्रमात हर्षाली लोखंडे-मुकणे, नंदकुमार सुर्वे, रुपक आचार्य, गायन अदिती काळे, तसेच शाहीर गंगाराम घरत यांनी शिवाजी महाराजांवर पोवाडा सादर करून श्रोत्यांना मंत्रमुग्ध केले. यानंतर लक्ष्मीनारायण मंदिरापासून पालघर शहरात शोभायात्रा काढण्यात आली. पारंपरिक वेशभूषा परिधान करून पालघरमधील नागरिक मोठ्या संख्येने सहभागी झाले होते. ढोल-ताशांच्या गजरात, वाजत-गाजत शोभायात्रा हुतात्मा चौकाजवळ आल्यानंतर समारोप करण्यात आला. या शोभायात्रेमध्ये महिला ढोल-ताशा पथकामध्ये सहभागी झाल्या होत्या.