निर्मळच्या आदिवासी तरुणाचा कारागृहात मृत्यू

निर्मळच्या आदिवासी तरुणाचा कारागृहात मृत्यू
काँग्रेसची चौकशी करण्याची मागणी
विरार, ता. ३० (बातमीदार) : वसई पश्चिमेकडील निर्मळ येथे होळीच्या दिवशी गैरसमजातून दोन गटांत वाद झाला होता. याप्रकरणी कैलास लहांगे या आदिवासी तरुणावर वसई पोलिस स्टेशनमध्ये गुन्हा दाखल करण्यात आला होता. त्यानंतर त्याची व त्याच्या लहान भावाची ठाणे कारागृहात रवानगी करण्यात आली. कारागृहात असताना कैलासचा संशयास्पद मृत्यू झाल्यामुळे या प्रकरणाची सखोल चौकशी करण्याची मागणी काँग्रेसच्या पर्यावरण विभागाचे प्रदेशाध्यक्ष समीर वर्तक आणि विविध संघटनांनी केलेली आहे.
निर्मळ येथे होळीच्या दिवशी दोन गटांत वाद झाला होता. त्यानंतर झालेल्या संशयास्पद मृत्यूमुळे त्याच्यावर दाखल करण्यात आलेल्या गुन्ह्याची चौकशी करून सखोल तपास करण्याची मागणी सामाजिक कार्यकर्ते शशी सोनवणे यांनीही केली आहे. कैलास हा गरीब तरुण होता. तो सहसा कोणाच्याही वादात पडत नव्हता. होळीच्या दिवशी तो भांडण सोडवण्यासाठी त्याठिकाणी गेला होता; परंतु त्याच्यावर गुन्हा नोंदवून त्याला तुरुंगात पाठवल्यामुळे त्याचा मृत्यू झाला. पोलिसांनी कोणाच्या दबावाखाली येऊन कैलासवर गुन्हा दाखल केला, याची चौकशी झाली पाहिजे, अशी मागणी आदिवासी एकता परिषदेचे अध्यक्ष दत्ता सांबरे यांनी केलेली आहे.