मेटल तुकड्यामुळे मध्य रेल्वेची वाहतूक विस्कळीत !

मेटल तुकड्यामुळे मध्य रेल्वे विस्कळित

मुंबई, ता. ४ : मध्य रेल्वेच्या आटगाव ते तानशेत स्थानकादरम्यान अप मार्गावरील ओव्हरहेड वायरवर मेटलचा तुकडा आढळल्याने काही काळ रेल्वे वाहतूक ठप्प झाली. यामुळे कसारा-सीएसएमटी लोकलसेवा प्रभावित झाली असून, प्रवाशांचे हाल झाले. शुक्रवारी (ता. ४) दुपारी २.२० वाजता हा तुकडा ओव्हरहेड वायरवर दिसून आला. प्रवासी सुरक्षेच्या कारणास्तव रेल्वेसेवा तत्काळ थांबवण्यात आली. घटनेची माहिती मिळताच मध्य रेल्वेचे अभियांत्रिकी पथक घटनास्थळी पोहोचले आणि ओव्हरहेड वायरची तपासणी केली. वायर सुरक्षित असल्याचे स्पष्ट झाल्यानंतर २.४२ वाजता रेल्वे वाहतूक पूर्ववत करण्यात आली. या घटनेमुळे तब्बल २२ मिनिटे मुंबईकडे जाणाऱ्या रेल्वे गाड्या रखडल्या. परिणामी, लोकलसेवा विस्कळित होऊन प्रवाशांना मनस्ताप सहन करावा लागला.