खारघरमध्ये भरदिवसा घरफोडी

खारघर, ता. ९ (बातमीदार) : भरदिवसा कडी-कोयंडा तोडून घरातील चार तोळे सोने, चांदी आणि ८० हजार रुपयांची रक्कम घेऊन चोरांनी पोबारा केल्याची घटना २ एप्रिलला दुपारी ३ च्या सुमारास खारघर सेक्टर १०मध्ये घडली.
खारघर सेक्टर १० कोपरगावमधील साई व्हीलामध्ये प्रवीणकुमार चौधरी (२८) राहतात. २ एप्रिलला किरणा मालाचे दुकान चालवणारे प्रवीणकुमार काही कामानिमित्त घरातून बाहेर पडले होते. दरम्यान, घरात कोणी नसल्याची संधी साधून चोरांनी त्यांच्या घराचे कुलूप तोडून चोरी केली. चोरांनी त्यांच्या घरातील चार तोळे सोने, चांदी आणि ८० हजार रुपयांची रक्कम लंपास केली. या घटनेची नोंद खारघर पोलिस ठाण्यात करण्यात आली आहे. चौधरी यांच्या घरात चोरी करतेवेळी चोर सीसीटीव्हीत कैद झाले आहेत; मात्र अद्याप पोलिसांना त्यांचा शोध घेता आला नाही. या गुन्ह्याचा तपास सहाय्यक पोलिस निरीक्षक रत्ना खंडेलवाल करीत आहेत. तीन महिन्यांपूर्वी याच परिसरात चिकन सेंटरमध्ये अशाच प्रकारे चोरी झाली होती. त्या घटनेत ४० हजार रुपये आणि मोबाईल चोरीला गेला होता.