मुंब्र्यात मीटरमध्ये फेरफार करून लाखोंची वीजचोरी उघडकीस,

मीटरमध्ये फेरफार करून वीजचोरी
कळवा (बातमीदार) : मुंब्र्यात टोरंट पॉवर वीज कंपनीच्या कर्मचाऱ्यांनी वीजपुरवठा तपासणी करताना वीजमीटरमध्ये फेरफार करून लाखो रुपयांची चोरी उघडकीस आणली आहे. वीजचोरी करणाऱ्या दोघांवर मुंब्रा पोलिस ठाण्यात वीजचोरीचा गुन्हा दाखल करण्यात आला आहे. टोरंट पॉवर वीज कंपनीचे कर्मचारी सायली दाभाडे यांनी मुंब्रा डोंगरीनगर येथील मलिक रेसिडेन्सी येथे विद्युत पुरवठ्याची तपासणी केली. या वेळी सैफुल इस्लाम (वय ४३) व हिना कौसर (३८) यांनी वीज मीटरमध्ये फेरफार केला होता. तसेच ७,६९५ युनिट वापरून दोन लाख ३० हजारांची चोरी केल्याचे उघड झाले आहे. यासंदर्भात मुंब्रा पोलिस ठाण्यात तक्रार दाखल केली असून, मुंब्रा पोलिसांनी या दोघा आरोपींवर वीजचोरीचा गुन्हा दाखल केला आहे.