वाशी-तुर्भे लिंकवरील बंद मार्गीका सुरू होणार

वाशी-तुर्भे लिंकवरील बंद मार्गिका सुरू होणार
आयआयटीचा अहवाल सादर; दुरुस्तीकरिता १२ कोटी खर्च
तुर्भे, ता. ९ (बातमीदार) ः वाशी-तुर्भे लिंक रोडवरील उड्डाणपुलाच्या दुरुस्तीसाठी वाशीहून तुर्भे स्टोअर (ठाणे)कडे जाणारी लेन लवकरच खुली होणार आहे. जून २०२४ पासून बंद करण्यात आलेल्या लेनचे काम लवकरच हाती घेतले जाणार आहे. तसेच, हे काम जूनअखेरपर्यंत पूर्ण करण्याचा मानस प्रशासनाचा असल्याचे सांगण्यात आले. हे काम आयआयटीच्या अहवालानुसार केले जाणार आहे. यासाठी प्रशासनाकडून संपूर्ण उड्डाणपुलाच्या दुरुस्तीकरिता १२ कोटी खर्च अपेक्षित आहे.
तुर्भे सेक्टर २१ नवी मुंबई महापरिवहन आगाराकडून ठाणे- बेलापूर रस्त्यावर तुर्भे स्थानकाकडे जाणाऱ्या उड्डाणपुलाच्या एका बाजूचा भाग काही प्रमाणात सुटलेल्या अवस्थेत असल्याचे पालिका प्रशासनाच्या निदर्शनास मागील वर्षी आले होते. त्या अनुषंगाने संरचना सल्लागार यांच्यामार्फत या उड्डाणपुलाच्या संबंधित मोडकळीस भागाची महापालिकेच्या अभियंत्यांसोबत प्रत्यक्ष स्थळपाहणी करण्यात आली होती. त्यानुसार संरचना सल्लागार यांच्याकडून उड्डाणपुलाच्या स्पॅनचा संरचना व स्थिरता अहवाल प्राप्त झाल्यावर पुढील अत्यावश्यक दुरुस्तीचे काम त्वरित हाती घेण्याचे निर्देश महापालिका आयुक्त डॉ. कैलास शिंदे यांनी दिले होते. त्या अनुषंगाने मागील दहा महिन्यांपासून तुर्भे वाहतूक पोलिस विभागामार्फत या उड्डाणपुलावरील ठाणे-बेलापूर रस्त्यावर तुर्भे स्थानकाकडे जाणारी वाहतूक सुरक्षिततेच्या दृष्टीने बंद करण्यात आली आहे. त्यामुळे ही वाहतूक सायन-पनवेल मार्गावरून सुरू आहे. आयआयटीच्या अहवालामुळे कामाला विलंब झाल्याने वाशी किंवा तुर्भे गाव तसेच आजूबाजूच्या परिसरातील नागरिकांना ठाणे- बेलापूरकडे येण्यासाठी सानपाडा स्थानकामार्गे घर गाठावे लागते. त्यासाठी नागरिकांचा वेळ व पैसादेखील खर्च होत आहे; मात्र आता उड्डाणपुलाच्या दुरुस्तीकामासाठी निविदा प्रक्रिया पार पडल्याने लवकरच काम सुरू होऊन पावसाळ्याआधी बंद असलेली मार्गिका पूर्ववत सुरू होणार असल्याचे पालिका प्रशासनाकडून सांगण्यात आले.
..................
संपूर्ण उड्डाणपुलाची दुरुस्ती ही आयआयटीच्या अहवालानुसार होणार आहे. पावसाळ्याआधीच काम पूर्ण केले जाईल, असे नवी मुंबई महापालिकेचे एक्झिक्युटिव्ह अभियंता प्रशांत देशमुख यांनी माहिती दिली आहे.