कारच्या धडकेत वृद्धेचा मृत्यू

तारापूर, ता. १० (बातमीदार) : रुग्णालयात वैद्यकीय तपासणीसाठी आलेल्या एका वृद्ध महिलेचा कारने दिलेल्या धडकेत मृत्यू झाल्याची घटना बोईसरमध्ये घडली. या अपघातप्रकरणी कारचालक डॉक्टरला पोलिसांनी ताब्यात घेतले.

तारापूरजवळील घिवली येथे राहणारे विश्वनाथ आरेकर हे आपल्या पत्नीसमवेत बुधवारी (ता. ९) सकाळी तारापूर अणू विद्युत प्रकल्पाच्या रहिवासी संकुलात असलेल्या रुग्णालयात वैद्यकीय तपासणीसाठी आले होते. छायालता आरेकर (वय ७३) या रुग्णालय इमारतीच्या बाहेर पडून रस्ता पार करीत असताना एका कारने त्यांना समोरून जोरदार धडक देत जवळपास १० ते १२ फूट अंतरापर्यंत फरपटत नेले. या अपघातात छायालता या गंभीर जखमी झाल्याने त्यांना उपचारासाठी तातडीने अणुऊर्जा प्रकल्पाच्या रुग्णालयात दाखल करण्यात आले, मात्र उपचारादरम्यान त्यांचे निधन झाले. या अपघातप्रकरणी कारचालक डॉ. आर. के. दास याला तारापूर पोलिसांनी ताब्यात घेत अटक केल्याची माहिती सहाय्यक पोलिस निरीक्षक निवास कणसे यांनी दिली.