कल्याणमध्ये ‘बिंदास म्हात्रे’ गजाआड

कल्याणमध्ये ‘बिंदास म्हात्रे’ गजाआड
सकाळ वृत्तसेवा
डोंबिवली, ता. १० : गावठी पिस्तूल घेऊन फिरणारा ‘बिंदास म्हात्रे’ (वय ३६) याला कल्याण गुन्हे शाखा, घटक-३ युनिट पथकाने अटक केली आहे. कल्याणच्या कोळसेवाडी परिसरातून त्याला ताब्यात घेतले. त्याच्या राहत्या घराची झडती घेतली असता एक देशी पिस्तूल, मॅगझिन, दोन जिवंत काडतुसे आणि एक काडतुसाची पुंगळी असा एकूण ६२ हजारांचा शस्त्रसाठा पोलिसांनी जप्त केला आहे.

कल्याण गुन्हे शाखा, घटक-३ युनिटमधील कार्यरत पोलिस शिपाई मिथुन राठोड यांना कल्याण कोळसेवाडी पोलिस ठाण्याच्या हद्दीतील नेतीवली चक्कीनाका परिसरात राहणारा एक व्यक्ती विनापरवाना गावठी पिस्तूल आणि काडतुसे बाळगत असल्याची माहिती मिळाली होती. त्यानुसार गुन्हे शाखेचे वरिष्ठ पोलिस निरीक्षक अजित शिंदे यांच्या मार्गदर्शनाखाली सापळा रचत पोलिसांनी बिंदास याला ताब्यात घेतले.

पोलिसांनी त्याच्या राहत्या घराची झडती घेतली असता, त्याच्याकडून एक गावठी पिस्तूल, मॅगझिन, दोन जिवंत काडतुसे आणि एक रिकाम्या काडतुसाची पुंगळी असा एकूण ६२ हजार रुपयांचा शस्त्रसाठा हस्तगत केला. याप्रकरणी कोळशेवाडी पोलीस ठाण्यात गुन्हा दाखल केला असून, आरोपीने हे पिस्तूल कुठून आणले व यामागील उद्देश काय होता, याचा तपास पोलिस करत आहेत.