मुंबईकरांसाठी २३८ नव्या एसी लोकल

मुंबईकरांसाठी २३८ नव्या एसी लोकल
‘मुंबई वन’मुळे एकाच तिकिटावर लोकल, मेट्रो, बसचा प्रवास
मुख्यमंत्री देवेंद्र फडणवीस व रेल्वेमंत्री अश्विनी वैष्णव यांची माहिती

सकाळ वृत्तसेवा
मुंबई, ता. ११ : मुंबईकरांच्या दैनंदिन प्रवासाचा चेहरामोहरा बदलवणाऱ्या दोन मोठ्या घोषणा शुक्रवारी (ता. ११) करण्यात आल्या. एकीकडे मुंबईकरांसाठी २३८ एसी लोकल लवकरच धावणार असल्याचे रेल्वेमंत्र्यांनी जाहीर केले; तर दुसरीकडे ‘मुंबई वन कार्ड’ नावाचे मल्टीमोडल स्मार्ट कार्ड येत्या एका महिन्यात प्रवाशांच्या सेवेत दाखल होणार असल्याची माहिती मुख्यमंत्री देवेंद्र फडणवीस यांनी दिली. केंद्रीय रेल्वेमंत्री अश्विनी वैष्णव व मुख्यमंत्री देवेंद्र फडणवीस यांनी संयुक्त पत्रकार परिषद घेऊन मुंबई आणि महाराष्ट्रासाठी मंजूर करण्यात आलेल्या विविध रेल्वे प्रकल्पांची माहिती दिली.

‘वन सिटी, वन कार्ड’ ही संकल्पना प्रत्यक्षात आणत मुंबईकरांसाठी विकसित करण्यात आलेलं ‘मुंबई वन कार्ड’ लवकरच कार्यान्वित होणार आहे. या एका कार्डच्या माध्यमातून लोकल, मेट्रो, बेस्ट बस आणि अन्य सार्वजनिक वाहतूक साधनांमधून प्रवास करता येणार आहे. या वेळी फडणवीस म्हणाले, की मुंबई वन कार्ड हे शहरातील प्रवासासाठी गेमचेंजर ठरणार आहे. यामुळे कनेक्टिव्हिटी वाढेल आणि प्रवास अधिक सुकर होईल. रेल्वे मंत्रालय आणि पर्यटन विभाग एकत्र येऊन १० दिवसांची विशेष ऐतिहासिक दौरा योजना राबवणार आहेत. यासोबतच १ मे ते ४ मे २०२५ दरम्यान मुंबईत  ‘वेव्ह समिट’  आयोजित केला जाणार आहे. हा समिट जगातील सर्जनशील आणि क्रिएटिव्ह क्षेत्रासाठी महत्त्वाचा मंच ठरणार असून यात १०० देशांचे प्रतिनिधी आणि पाच हजार स्पर्धक सहभागी  होतील. या समिटमुळे मुंबईचं नाव ग्लोबल नकाशावर झळकणार आहे. दरम्यान, कोकण रेल्वे हे स्वायत्त मंडळ आहे. त्यामुळे नवीन स्थानक, दुहेरीकरणासाठी आवश्यक निधी उभारण्यात अडचणी येतात. त्यामुळे कोकण रेल्वेला भारतीय रेल्वेत सामावून घेण्याबाबत गोवा सरकार आणि महाराष्ट्र राज्य सरकारने रेल्वेमंत्र्याशी चर्चा केली, त्यास रेल्वेमंत्री सकारात्मक असल्याचेही फडणवीस यांनी सांगितले.

‘मुंबईसाठी नव्या बांधणीच्या  २३८ नवीन वातानुकूलित लोकल गाड्या आणल्या जाणार आहेत. या लोकलमध्ये प्रवाशांच्या सुरक्षिततेसाठी आधुनिक तंत्रज्ञान, अधिक आरामदायक आसन व्यवस्था, ऊर्जा बचतीसाठी स्मार्ट प्रणाली आणि सीसीटीव्ही यांसारख्या सुविधा असतील. सध्या या आधुनिक एसी लोकलचे डिझाइन तयार करण्यात येत आहे. मुंबईतील पावसाळ्यातील वारंवार होणाऱ्या वाहतूक खोळंब्यांचा विचार करून रेल्वे मंत्रालयाने विशेष उपाययोजना केल्या आहेत. यामध्ये पॉइंट मशीन बदल, मायक्रो ड्रेनेज प्रणाली आणि दीड फूट पाण्यातही गाड्या चालतील, अशी यंत्रणा तयार करण्यात येत असल्याची माहिती रेल्वेमंत्र्यांनी या वेळी दिली.

केंद्र सरकारने नुकतीच १८,६५८ कोटी रुपयांच्या चार  मल्टीट्रॅकिंग प्रकल्पांना मंजुरी दिली आहे. यामध्ये महाराष्ट्र, ओडिशा आणि छत्तीसगड या राज्यांचा समावेश आहे. महाराष्ट्रासाठी यामध्ये सर्वाधिक महत्त्वाचा प्रकल्प म्हणजे गोंदिया-बल्लारशहा रेल्वेमार्गाचे २४० किमी लांबीचे दुहेरीकरण. या प्रकल्पासाठी ४८१९ कोटी रुपयांची तरतूद करण्यात आली असून यामुळे या भागातील प्रवासी व मालवाहतूक सेवा वेगवान होणार आहे.
- अश्विनी वैष्णव, रेल्वेमंत्री

रेल्वे मंत्रालयाच्या या प्रकल्पांमुळे महाराष्ट्राच्या पूर्वेकडील भागांतील कनेक्टिव्हिटी सुधारणार असून विदर्भ, छत्तीसगड, तेलंगणा आणि मध्य प्रदेशातील व्यापार व पर्यटनालाही चालना मिळणार आहे, असे फडणवीस म्हणाले. त्याचबरोबर  राज्यातील तब्बल १३२ स्थानकांचा पुनर्विकास एकाच वेळी सुरू आहे. यंदाच्या केंद्रीय अर्थसंकल्पात राज्यात २३ हजार ७०० कोटी रुपये रेल्वेच्या प्रकल्पांकरिता मिळाले आहेत.
- देवेंद्र फडणवीस, मुख्यमंत्री

कार्यालयीन वेळा बदलण्यावर पुनर्विचार
मुंबईच्या लोकलमधील एकाच दिशेने होणारी गर्दी टाळण्यासाठी कार्यालयीन वेळांमध्ये बदल करण्याचा प्रस्ताव पुन्हा एकदा चर्चेत आला आहे. पूर्वी अनेक संस्थांनी याला विरोध केला होता; मात्र आता पुन्हा मंत्रालयस्तरावर त्याबाबत चाचपणी केली जात असल्याची माहिती मुख्यमंत्र्यांनी या वेळी दिली.