शिक्षणासह उत्तम संस्कारांचीही आवश्यकता ः आर. राधाकृष्णन

शिक्षणासह उत्तम संस्कारांचीही आवश्यकता ः आर. राधाकृष्णन
तुर्भे, ता. १४ (बातमीदार) ः सध्याच्या स्पर्धेच्या युगामध्ये पालकांनी आपल्या मुलांना उत्तम शिक्षणासह उत्तम संस्कार देखील कसे मिळतील, हे पाहण्याची आवश्यकता आहे, असे प्रतिपादन श्रीराम राधाकृष्णन मेमोरियल ट्रस्टचे संचालक आर. राधाकृष्णन यांनी नेरूळ येथे केले. श्रीराम राधाकृष्णन मेमोरियल ट्रस्टच्या शिक्षणांगणचा दुसरा वार्षिक स्नेहसंमेलन सोहळा नेरूळ येथे आयोजित करण्यात आला होता. या वेळी ते बोलत होते.
श्रीराम राधाकृष्णन मेमोरियल ट्रस्टच्या वतीने ठाणे आणि रायगड जिल्ह्यात गरजू विद्यार्थ्यांना शिक्षणांगण उपक्रमाअंतर्गत मोफत शिकवणी वर्ग घेतले जातात. नवीन पनवेल, खांदेश्वर, खांदा कॉलनी, बेलापूर गाव, सीबीडी, बोनसरी, रबाळे, दिघा, कळवा आणि ठाणे येथे हा उपक्रम सुरू आहे. या शिक्षण संस्थांच्या मुलांनी नेरूळ येथील आगरी कोळी सभागृहात त्यांची कला सादर केली. या वेळी ट्रस्टचे शुभचिंतक, देणगीदार, मुले आणि त्यांचे पालक उपस्थित होते. प्रमुख पाहुणे प्रतीश नायर यांनी पालकांप्रती प्रेम व्यक्त करण्याचे महत्त्व अधोरेखित केले. या वेळी ट्रस्टचे व्यवस्थापक अजित खताळ आणि बोनसोरी शिक्षण संस्थानच्या शिक्षिका सुप्रिया कोळी यांनी कार्यक्रमाचे सूत्रसंचालन केले. कार्यक्रमाची सुरुवात स्वागत गीत आणि दीपप्रज्वलनाने झाली. या वेळी विद्यार्थ्यांनी डॉ. बाबासाहेब आंबेडकर यांचे शिक्षणातील योगदान, भारतीय सण, महिलांचे जीवन आणि आजी-आजोबांचे महत्त्व, डॉक्टर बनणारी पहिली भारतीय महिला आनंदीबाई गोपाळ जोशी, महिला सक्षमीकरण, खेळाचे महत्त्व, जीवनात कधीही हार मानू नका, गरिबांच्या उत्थानात शिक्षणाचा परिणाम आदी विषयांवर सांस्कृतिक कार्यक्रम सादर केले.