शिक्षकाला ६६ लाखांचा गंडा
सोन्याच्या गुंतवणुकीच्या नावाखाली महिलेकडून फसवणूक
कल्याण, ता. १३ (बातमीदार) : फेसबुकवर मैत्री केलेल्या महिलेने एका ५४ वर्षीय शिक्षकाला सोन्याच्या गुंतवणुकीच्या नावाखाली ६६ लाख १० हजार रुपयांचा गंडा घातला आहे. १० ते २० टक्के वाढीव नफा मिळण्याच्या प्रलोभनापायी शिक्षकाला आयुष्यभराची पुंजी गमवावी लागली. याप्रकरणी कल्याणमधील कोळसेवाडी पोलिस ठाण्यात गुन्हा दाखल झाला असून, पोलिस अधिक तपास करत आहेत.
कल्याण पूर्वेतील लोकधारा सह्याद्री भागातील एका ५४ वर्षीय शिक्षकाची एका महिलेने फसवणूक केली. या प्रकरणात अद्याप कोणाला अटक केलेली नाही. शिक्षकाने दाखल केलेल्या तक्रारीत नोंदविण्यात आलेल्या माहितीनुसार, मागील महिन्यात या शिक्षकाला एका महिलेकडून फेसबुकवर फ्रेंड रिक्वेस्ट आली होती. महिलेची फ्रेंड रिक्वेस्ट स्वीकारल्यानंतर त्या महिलेने एक दिवस बीअरस्टीर नावाच्या संकेतस्थळाची लिंक त्या शिक्षकाला पाठविली. आपण सोन्यामध्ये गुंतवणूक करण्यास इच्छुक आहात का, असे प्रश्नदेखील केले. या सोन्याच्या माध्यमातून गुंतवणूक केली, तर तुम्हाला १० ते २० टक्के नफा गुंतवणुकीच्या माध्यमातून मिळवून देऊ, असे प्रलोभन शिक्षकाला दाखविले.
शिक्षकाचा हळूहळू विश्वास संपादन केल्यानंतर महिलेने मोबाईलच्या माध्यमातून शिक्षकाशी ऑनलाइन संवादसुद्धा साधण्यास सुरुवात केली. सोन्यामधील गुंतवणुकीसाठी महिलेने शिक्षकाला दिलेल्या बँक खात्यात रक्कम वळती करण्यास एक दिवस सांगितले. अल्पावधीत झटपट अधिकचा परतावा मिळतो म्हणून शिक्षकाने टप्प्या-टप्प्याने ७ फेब्रुवारी ते २९ मार्च या कालावधीत एकूण ६६ लाख १० हजार रुपये महिलेने दिलेल्या बँक खात्यावर वळते केले. एवढी मोठी रक्कम गुंतवणूक केल्यावर शिक्षकाने महिलेकडे गुंतवणूक रकमेवरील नफा मागण्यास सुरुवात केली. विविध कारणे देऊन महिलेने वाढीव नफा देण्यास टाळाटाळ सुरू केली. वाढीव नफा मिळत नसल्याने शिक्षकाने आपली गुंतवणुकीची मूळ ६६ लाख १० हजारांची रक्कम परत करण्यासाठी महिलेकडे तगादा लावला. महिला शिक्षकाला दाद देत नव्हती. त्यानंतर महिलेने शिक्षकाच्या संपर्काला प्रतिसाद देणे बंद केले आणि फसवणूक करणाऱ्या महिलेने जवळील दोन्ही फोन बंद केले. महिलेने आपली फसवणूक केल्याचे निदर्शनास आल्यावर शिक्षकाने कोळसेवाडी पोलिस ठाण्यात जाऊन तक्रार केली. पोलिसांनी माहिती आणि तंत्रज्ञान कायद्याने गुन्हा दाखल करून तपास सुरू केला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.