सिडको घरांच्या अवास्तव किंमतीविरोधात चित्र प्रदर्शन

सिडको घरांच्या अवास्तव किमतीविरोधात चित्र प्रदर्शन
वाशी, ता. १३ (वार्ताहर) : सिडकोच्या सोडतीतील घरांच्या अवास्तव किमतीविरोधात मनसे व सिडको सोडतधारकांच्या वतीने रविवारी (ता. १३) वाशी येथे भव्य चित्र प्रदर्शनाचे आयोजन करण्यात आले होते. सिडकोने परवडणाऱ्या घरांची घोषणा केली असली तरी प्रत्यक्षात घरांच्या किमती सामान्यांच्या आवाक्याबाहेर गेल्याचा आरोप सोडतधारकांनी या वेळी केला आहे.
या प्रदर्शनाचे उद्घाटन मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्या मुखवट्यांद्वारे प्रतीकात्मक पद्धतीने करण्यात आले. या माध्यमातून सरकारच्या व सिडकोच्या भूमिकेवर सोडतधारकांनी तिखट टीका केली. चित्रांद्वारे सिडकोच्या भूमिकेवर प्रश्नचिन्ह निर्माण करण्यात आले. खारघर, वाशी, तळोजा, खारकोपर आदी नोडमधील सोडतधारकांनी सिडकोच्या दररोजच्या प्रकल्पांमधील विसंगती, दर्जा आणि किंमतीतील तफावत विविध चित्रांद्वारे यावेळी मांडली. मनसेचे शहर अध्यक्ष गजानन काळे यांच्या नेतृत्वाखाली सिडकोविरोधात सुरू असलेल्या लढ्यात हे प्रदर्शन एक टप्पा ठरला. कायदेतज्ज्ञ शहाजी पाटील यांनी सिडकोविरोधात रेरा कायद्यानुसार कायदेशीर मार्गदर्शन केले. तसेच येत्या बुधवारी सर्व सोडतधारकांसोबत रेरा कार्यालयात तक्रार दाखल करण्यात येईल, अशी घोषणा काळे यांनी केली.