मुरबाडमधील वाहतूक कोंडी सुटणार

मुरबाड, ता. १५ (बातमीदार)ः कल्याण-मुरबाड माळशेज घाट रस्त्यावरील उड्डाणपुलावरील काँक्रीटचे गर्डर बसवण्यात आले आहेत. मुरबाड एसटी बसस्थानकासमोर उभारण्यात येणारा हा पहिलाच उड्डाणपूल असून, माळशेज घाट, कल्याण मार्गावरील वाहतूक कोंडी सुटणार आहे.
मुरबाड शहरातील सोनार पाडा भागातून उड्डाणपुलाचे काम सुरू करण्यात आले आहे, तर त्याचे शेवटचे टोक सारिका हॉटेलजवळील पेट्रोलपंपापर्यंत आहे. या उड्डाणपुलामुळे मुरबाड शहराची गाव आणि औद्योगिक वसाहत परिसराची विभागणी झाली आहे. या पुलामुळे मुरबाड बसस्थानक परिसरात होणाऱ्या वाहतूक कोंडीतून सुटका होणार असून, माळशेज घाट तसेच कल्याणकडे जाणारी वाहने पुलावरून जाणार आहेत.
--------------------------------------------
दुकानदारांच्या व्यवसायावर परिणाम
मुरबाड बसस्थानकाजवळील तीनहात नाका परिसरात विविध फळभाज्या, पालेभाज्या, रताळी, चवळीच्या शेंगा, मिरची खरेदीसाठी येणारी वाहने आता उड्डाणपुलावरून जाणार आहेत. त्याचबरोबर उड्डाणपुलामुळे छोट्या दुकानदारांवरही परिणाम होणार आहे.