काळूराम धोदडे यांना मरणोत्तर जीवनगौरव पुरस्कार

विरार, ता. १५ (बातमीदार) : स्वातंत्र्यसैनिक रामचंद्र विनायक उर्फ रा. वि. भुस्कुटे स्मृती जीवन गौरव पुरस्कार मरणोत्तर काळूराम धोदडे आणि युवा पुरस्कार सुनील मलावकर यांना जाहीर झाला आहे. या पुरस्काराचे वितरण उद्या (ता. १६) पालघर पूर्वेतील नवली येथील सूर्यवंशी क्षत्रिय ज्ञातिहितवर्धक मंडळाच्या कै. गोविंदराव दादोबा ठाकूर सभागृहात होणार आहे, असे स्वातंत्र्यसैनिक रा. वि. भुस्कुटे जीवनगौरव पुरस्कार समितीचे अध्यक्ष पराग ओक यांनी म्हटले आहे. भूमिसेना व आदिवासी एकता परिषदेचे संस्थापक काळूराम धोदडे उर्फ काका यांनी शेवटच्या श्वासापर्यंत आदिवासी, भूमिपूत्र, मच्छीमारांसह शेतकरी यांच्या घटनात्मक न्याय हक्कांसाठी संघर्षरत राहिले. कष्टकरी संघटनेचे युवा कार्यकर्ते, डहाणूतील आंबेसरीता येथील सुनील किकू मलावकर यांनी शिक्षण, वन हक्क, जमीन हक्क, आरोग्य हक्क आणि महिला हक्कांविषयी घटनात्मक मार्गाने संघर्षरत राहून काम करत आहेत.