पदोन्नती मिळूनही आताचे रुग्‍णालय सोडण्यास नकार

पदोन्नती मिळूनही आताचे रुग्‍णालय सोडण्यास नकार
सहाय्यक वैद्यकीय अधिकाऱ्यांना कारवाईचा इशारा
सकाळ वृत्तसेवा
मुंबई, ता. १४ : मुंबई महापालिकेचे कामकाज सध्या लोकप्रतिनिधींशिवाय सुरू आहे. त्‍यामुळे पालिकेच्या इतर विभागांप्रमाणे आरोग्य विभागाच्या अंतर्गत येणारी सर्व रुग्णालयेही मनमानी पद्धतीने काम करत आहेत. अनेक सहाय्यक वैद्यकीय अधिकाऱ्यांना इतर रुग्णालयात बढती देऊनही ते त्यांचे अस्तित्वात असलेले संबंधित रुग्णालय सोडू इच्छित नाहीत किंवा रुग्णालये त्यांना कर्तव्यातून मुक्त करण्याच्या मनःस्थितीत नाहीत. आता महापालिका प्रशासनाने याबाबत कडक कारवाई करण्यास सुरुवात केली आहे.
मुंबईत केईएम, सायन, नायर, कूपर या महापालिकेच्या चार प्रमुख रुग्णालयांव्यतिरिक्त, १६ उपनगरीय, ३० प्रसूती रुग्णालये, पाच विशेष रुग्णालये, दोन हजार ११२ आरोग्य केंद्रे, १९२ दवाखाने, २५० हिंदुहृदयसम्राट बाळासाहेब ठाकरे आपला दवाखाने आहेत. सुमारे ५००-६०० सहाय्यक वैद्यकीय अधिकारी सेवा देत आहेत. या वैद्यकीय अधिकाऱ्यांपैकी सुमारे ५० सहाय्यक वैद्यकीय अधिकाऱ्यांच्या पदोन्नतीबाबत २१ जानेवारी २०२५ रोजी वैद्यकीय अधिकारीवर्गाच्या पदोन्नती समितीची बैठक झाली. या बैठकीत झालेल्या निर्णयानुसार, सदर सहाय्यक वैद्यकीय अधिकाऱ्यांच्या पदोन्नतीचे आदेश जारी करण्यात आले. याअंतर्गत पदोन्नतीचे आदेश प्राप्त करणाऱ्या अधिकाऱ्यांना एका महिन्याच्या आत त्यांच्या कर्तव्यातून मुक्त करणे आणि पदोन्नतीच्या ठिकाणी हजर राहणे बंधनकारक आहे, परंतु जवळपास साडेतीन महिने उलटूनही, पदोन्नती मिळालेल्या सहाय्यक वैद्यकीय अधिकाऱ्यांना संबंधित रुग्णालयांनी त्यांच्या कर्तव्यातून मुक्त केलेले नाही.
यासोबतच, मुख्य वैद्यकीय अधिकाऱ्यांना त्यांच्या अधिनस्थ उपनगरीय रुग्णालयांना यासंदर्भात सूचना देण्यास सांगण्यात आले आहे, मात्र यासंदर्भात अधिक माहितीसाठी मुख्य वैद्यकीय अधिकाऱ्यांशी संपर्क साधला असता होऊ शकला नाही.

आरोग्य विभागाचे कडक निर्देश
महापालिकेच्या कार्यकारी आरोग्य अधिकारी डॉ. दक्षा शाह यांनी अलीकडेच एक लेखी आदेश जारी करत कडक स्वरात म्हटले आहे की, पदोन्नतीचे आदेश मिळालेल्या अधिकाऱ्यांना त्यांच्या कर्तव्यावरून तत्काळ मुक्त केले जात नसल्याचे दिसून आले आहे, उलट त्यांना त्याच ठिकाणी काम करण्यास सांगितले जात आहे. तसेच त्यांच्या जागी इतर कर्मचाऱ्यांची बदली करण्याची मागणी आहे. ही बाब अत्यंत आक्षेपार्ह आहे. अधिकाऱ्यांना विहित वेळेत सेवामुक्त केले नसल्‍यास त्यांच्या सेवा ज्येष्ठतेवर परिणाम झाला किंवा कोणताही कायदेशीर प्रश्‍न निर्माण झाल्‍यास त्याची संपूर्ण जबाबदारी संबंधित आस्थापनेची असेल.

रुग्‍णालय प्रशासनाकडून मदत
सूत्रांनी दिलेल्या माहितीनुसार, वैद्यकीय अधिकारी म्हणून बढती मिळालेले सहाय्यक वैद्यकीय अधिकारी ते वास्तविक ज्या ठिकाणी सेवा देत आहेत, ते ठिकाण सोडू इच्छित नाहीत. हे सर्व जण विविध युक्त्या वापरतात हेदेखील समोर आले आहे. यामध्ये त्यांना रुग्णालय प्रशासनाकडूनही मदत केली जात आहे.