वयोवृद्धाचे दागिने लंपास करणारा गजाआड

उल्हासनगर, ता. १५ (बातमीदार) : बदलापूरच्या हद्दीत एका वयोवृद्ध महिलेच्या फ्लॅटमध्ये घरफोडी करून सोन्याचे दागिने लंपास करणारा एक आरोपी उल्हासनगर गुन्हे शाखेच्या गळाला लागला आहे. हा गुन्हा नऊ महिन्यांनंतर उघडकीस आला आहे. यातील दुसरा आरोपी फरार असल्याची माहिती वरिष्ठ पोलिस निरीक्षक अशोक कोळी यांनी दिली.

नऊ महिन्यांपूर्वी बदलापूर पश्चिम भागात राहणाऱ्या लक्ष्मी ही वयोवृद्ध महिला फ्लॅटचा दरवाजा बंद करून बाहेर देशातील नातलगांकडे गेली होती. याच संधीचा फायदा घेणाऱ्या चोरट्यांनी घरफोडी करून ५८ ग्रॅम सोन्याचे दागिने लंपास केले होते. घटनेचा समांतर तपास उल्हासनगर गुन्हे शाखेकडे होता. अशा वेळी नऊ महिन्यांनंतर गुन्हे शाखेचे पोलिस हवालदार गणेश गावडे यांना बदलापूर घरफोडी प्रकरणातील रेकॉर्डवरील आरोपी आफताब इर्शाद मोमिन हा भिवंडीमध्ये असल्याची माहिती मिळाली. या माहितीच्या आधारे वरिष्ठ पोलिस निरीक्षक अशोक कोळी यांच्या मार्गदर्शनाखाली सहायक पोलिस निरीक्षक श्रीरंग गोसावी, हवालदार गणेश गावडे, पिंट्या थोरवे, योगेश वाघ, प्रकाश पाटील, रितेश वंजारी, कॉन्स्टेबल अशोक थोरवे, रामदास उगले, महिला पोलिस कुसुम शिंदे यांनी भिवंडी येथे सापळा रचून मोमिनला ताब्यात घेतले. मोमिनने विरु दाभी याच्यासोबत घरफोडी केल्याची कबुली दिली. ५८ ग्रॅम सोन्यापैकी २५ ग्रॅम सोने वाट्याला आले होते. ते सोनाराला विकल्याचे सांगितल्यावर पोलिसांनी विकलेले सोने सोनाराकडून हस्तगत केले. या दागिन्यांची किंमत सव्वा दोन लाख रुपये आहे. मोमिनवर नारपोली, मानपाडा पोलिस ठाण्यात गुन्हे दाखल असल्याची माहिती वरिष्ठ पोलिस निरीक्षक अशोक कोळी यांनी दिली.