जेएनपीएची यंदा २१ टक्के जास्त कंटेनर वाहतूक

उरण, ता. ७ (वार्ताहर) : भारताच्या सर्वोत्तम कामगिरी करणाऱ्या जवाहरलाल नेहरू पोर्ट प्राधिकरणाने एप्रिल २०२५ मध्ये ६६७,९२२ टीईयू कंटेनर हाताळले आहेत, जे एप्रिल २०२४ मधील कंटेनर वाहतुकीच्या तुलनेत तब्बल २१.२८ टक्के जास्त असल्याची माहिती जेएनपीए अधिकाऱ्यांनी दिली.
जेएनपीएच्या उन्नत बंदर पायाभूत सुविधा, सक्रिय कार्गो सुविधा आणि कळीच्या व्यापारी मार्गाची वाढती मागणी या प्रेरक पार्श्वभूमीवर एप्रिलमधील या जोमदार वाढीने आर्थिक वर्ष २०२५-२६ साठी एक सशक्त सूर गवसला आहे. याच अनुषंगाने जेएनपीए पश्चिम किनाऱ्यावरील कंटेनरच्या व्यापारासाठी पसंतीचे प्रवेश‌द्वार म्हणून आपले स्थान बळकट करत आहे. जेएनपीएने एप्रिल २०२५ मध्ये ६६७,९२२ टीईयू कंटेनर आणि ८.४४ दशलक्ष टन एकूण मालवाहतूक हाताळली, जी एप्रिल २०२४ मधील वाहतुकीच्या तुलनेत अनुक्रमे २१.२८ टक्के आणि १७.८१ टक्के जास्त आहे. एप्रिल २०२५ मध्ये जेएनपीएने ५८९ कंटेनर रॅक हाताळत एप्रिल २०२४ मधील ४८६ कंटेनर रॅकच्या तुलनेत २१.१९ टक्के वाढ नोंदवली. त्या अनुषंगाने रेल्वेने वाहतूक केलेल्या कंटेनरचे प्रमाण ९३,७५८ टीईयूपर्यंत पोहोचले असून, त्यात २४.२४ टक्क्यांची वार्षिक वाढ नोंदवली गेली.