शेअर ट्रेडिंगद्वारे महिलेची १.६२ कोटींची फसवणूक

शेअर ट्रेडिंगद्वारे महिलेची १.६२ कोटींची फसवणूक
अंधेरी, ता. ७ (बातमीदार) ः शेअर ट्रेडिंगद्वारे एका महिलेची १.६२ कोटींची फसवणूक केल्‍याच्या कटातील एका आरोपीस उत्तर सायबर सेल पोलिसांनी रविवारी (ता. ४) अटक केली. इकाउल्ला समीउल्ला सय्यद असे या ३५ वर्षीय आरोपीचे नाव असून, त्याला बोरिवलीतील स्थानिक न्यायालयाने पोलिस कोठडी सुनावली आहे.
फसवणुकीची काही रक्कम इकाउल्लाने उघडलेल्या बँक खात्यात जमा केल्याचा आरोप आहे. त्याच्यासह इतर आरोपींनी सायबर ठगांसाठी बँकेत खाती उघडली होती, असे पोलिसांनी सांगितले. ५० वर्षांची तक्रारदार महिला कांदिवलीत राहते. फेब्रुवारीत तिने सोशल मीडियावर शेअर ट्रेडिंगसंदर्भातील एक लिंक ओपन केली होती. त्‍यानंतर तिला एका व्हॉट्‌सॲप ग्रुपमध्ये सहभागी करण्यात आले. काही दिवसांनी ग्रुप अ‍ॅडमिनने तिला शेअर ट्रेडिंगमध्ये गुंतवणुकीचा सल्ला देताना चांगला परतावा देण्याचे आश्वासन दिले होते. या प्रलोभनाला बळी पडून तिने फेब्रुवारी आणि मार्च २०२५ या कालावधीत शेअर ट्रेडिंगमध्ये एक कोटी ४२ लाखांची गुंतवणूक केली होती. या गुंतवणुकीवर तिला चांगला नफा झाल्याचे दिसून आले, मात्र ही रक्कम तिच्या खात्यात ट्रान्स्फर करण्यासाठी ग्रुप अ‍ॅडमिनने तिच्याकडे १९ लाखांची मागणी केली होती. तिने १९ लाख रुपये ट्रान्स्फर केले होते, मात्र तिच्या बँक खात्यात तिची मूळ आणि परताव्याची रक्कम जमा झाली नव्हती. हा प्रकार संशयास्पद वाटताच तिने कंपनीच्या अधिकृत कार्यालयात कॉल करून ही माहिती सांगितली. या वेळी कंपनीने तिच्या नावाने कंपनीत कुठलेही अकाउंट नसल्याचे सांगण्यात आले. हा प्रकार लक्षात येताच तिने सायबर हेल्पलाइनसह सायबर सेल विभागात तक्रार केली होती. बोगस कंपनीच्या चारही सायबर ठगाविरुद्ध पोलिसांनी गुन्हा दाखल केला होता. गुन्हा दाखल होताच पोलिसांनी आरोपींचा शोध सुरू केला होता. याच गुन्ह्यांत वॉण्टेड असलेल्या इकाउल्ला याला पोलिसांनी एक महिन्यानंतर अटक केली.