बनावट पावती पुस्तकाच्या आधारे फसवणूक

पनवेल, ता. ८ (वार्ताहर) : पीयूष एंटरप्रायझेस या कंपनीच्या मालकाने बनावट गौण खनिज वाहतूक पावती पुस्तक बनवून त्यावर रायगडच्या जिल्हा खनिजकर्म अधिकाऱ्यांचा बनावट शिक्का मारून त्या पावत्यांच्या आधारे दगडखाणीची बेकायदा वाहतूक करून सरकारची लाखो रुपयांची रॉयल्टी बुडविल्याचे उघडकीस आले आहे. पनवेल शहर पोलिसांनी कंपनीच्या मालकाविरोधात गुन्हा दाखल करून तपासाला सुरुवात केली आहे.
जवाहरलाल नेहरू पोर्ट ॲथॉरिटीने डिसेंबर २०२४मध्ये रायगड जिल्हाधिकारी कार्यालयात गौण खनिजाची वाहतूक झालेल्या बनावट पावत्या जमा करून त्याबाबत माहिती दिली होती. रायगड जिल्हाधिकाऱ्यांच्या आदेशाने मंडळ अधिकारी मीनाक्षी गोंधळी यांनी दोन्ही पावती पुस्तकांची तपासणी केली असता, त्या पुस्तकावर जिल्हा खनिजकर्म अधिकारी रायगड यांचा बनावट शिक्का असल्याचे आढळून आले. हे पावती पुस्तक पीयूष एंटरप्रायझेस या कंपनीने तयार केल्याचे निदर्शनास आले. यावरून बनावट गौण खनिज पावत्यांच्या आधारे दगडखाणीची बेकायदा वाहतूक करून राज्य सरकारची लाखो रुपयांची रॉयल्टी बुडविण्यात येत असल्याचे निदर्शनास आले.
----------------------
पावत्या, शिक्के कुठे तयार केले?
पावती पुस्तकाची छाननी करून मंडळ अधिकारी गोंधळी यांनी पनवेल शहर पोलिस ठाण्यात तक्रार दाखल केली. त्यानुसार पोलिसांनी पीयूष एंटरप्रायझेस या कंपनीविरोधात फसवणुकीसह बनावटगिरी करणे, तसेच महाराष्ट्र जमीन महसूल अधिनियमानुसार गुन्हा दाखल केला आहे. तसेच बनावट गौण खनिज वाहतुकीच्या पावत्या कुठे छापण्यात आल्या, तसेच त्यावर मारण्यात आलेले जिल्हाधिकारी कार्यालयाचे सरकारी शिक्के कुठे तयार केले, याबाबत पोलिसांकडून अधिक तपास करण्यात येत आहे.