सीवूड्समधील उद्यानांत मद्यपींचा उपद्रव

नेरूळ, ता. ८ (बातमीदार) : सीवूड्स येथील उद्यानांमध्ये मद्यपींचा उपद्रव वाढला असून, दारूच्या बाटल्या उद्यानात तशाच फेकून दिल्या जात आहेत. त्यामुळे उद्यानांना बकालपणा येत आहेत. तसेच फिरण्यासाठी सहकुटुंब येणाऱ्यांनाही याचा त्रास सहन करावा लागत आहे. रात्रीच्या वेळी रंगणाऱ्या पार्ट्यांमुळे त्या ठिकाणी दारूच्या बाटल्यांचा खच साचत आहे. यावरून उद्यानाची सुरक्षा आणि पोलिसांची गस्त यावर प्रश्नचिन्ह उपस्थित होत आहे.
सीवूड्स सेक्टर ४८ येथील डॉ. बाबासाहेब आंबेडकर उद्यानाला गालबोट लावण्याचा प्रकार होताना दिसत आहे. हे उद्यान रात्रीच्या वेळी दारूड्यांचा अड्डा बनत चालले आहे. उद्यानात दारूच्या पार्ट्या रंगत असून, तेथे बाटल्या फेकल्या जात आहेत. सकाळी उद्यानात येणारे नागरिक बाटल्या पाहून संताप व्यक्त करत असून, येथे गस्त घालण्याची मागणी पोलिसांकडे होत आहे. याचा त्रास उद्यानात येणारे ज्येष्ठ नागरिक, लहान मुलांना सहन करावा लागत आहे. त्यामुळे प्रशासनाने नागरिकांच्या हिताची भूमिका बजावावी, अशी मागणी माजी नगरसेवक भरत जाधव यांनी केली आहे.