गोवेली गावाला २५ वर्षानंतर शुद्ध पाणी

गोवेली गावाला २५ वर्षांनंतर शुद्ध पाणी
सेफ वॉटर नेटवर्कचा आयजल स्टेशन उपक्रम

टिटवाळा, ता. ८ (वार्ताहर) : पाण्यासाठी अनेक ग्रामीण आणि दुर्गम भागातील नागरिकांना वणवण करावी लागते. अशा परिस्थितीत शुद्ध पाणी मिळणे म्हणजे येथील ग्रामीण भागासाठी केवळ अशक्य बाब आहे; मात्र कल्याण तालुक्यातील गोवेली गावात समाजसेवक कैलाश धुमाळ तसेच राम चोरगे यांच्या सहकार्यातून तसेच सेफ वॉटर नेटवर्कच्या इंडिया या संस्थेच्या माध्यमातून तब्बल २५ वर्षानंतर शुद्ध पाणी मिळाले आहे .

गोवेली गावात गेली अनेक वर्षे पाण्याची समस्या भेडसावत होती. त्यातूनच स्वच्छ पाणी मिळणे हे दुरापास्तच होते. या समस्येवर तोडगा काढण्यासाठी गावातील समाजसेवक धुमाळ तसेच त्यांचे चोरगे व अन्य मंडळी यांनी पुढाकार घेत स्वच्छ, सुरक्षित व परवडणाऱ्या दरात पिण्याच्या पाण्याचा पुरवठा करण्यासाठी कार्यरत असलेल्या सेफ वॉटर नेटवर्क इंडिया संस्थेच्या उपक्रमाबद्दल माहिती मिळवत आपल्या गोवेली गावासाठी संस्थेचा आयजल स्टेशन हा उपक्रम सुरू केला आहे. या माध्यमातून ग्रामस्थांना एका प्रीपेड कार्डच्या माध्यमातून २० लिटर पाण्याचा जार हा केवळ सात रुपयांत मिळणार असल्याची माहिती संस्थेचे शंकर बत्रा यांनी गोवेली गावातील आयजल स्टेशन कार्यक्रमाच्या उद्घाटनप्रसंगी दिली.

कार्यक्रमाला समाजसेवक कैलाश धुमाळ, राम चोरगे, गोवेली गावच्या सरपंच पूजा जाधव, माजी उपमहापौर बुधाराम सरनोबत, माजी सभापती योगेश धुमाळ तसेच इक्बाल मणियार यांसह अनेक ग्रामस्थ उपस्थित होते. सेफ वॉटर नेटवर्क या संस्थेने आतापर्यंत ३४३ जलकेंद्रे स्थापन करून सुमारे १३ लाख नागरिकांना थेट लाभ दिला आहे. या जल केंद्रांमुळे महिलांचा वेळ वाचतो आहे, आरोग्य सुधारते आहे आणि सामाजिक विकासाला चालना मिळत आहे.