घातक शस्त्रांच्या विक्रीसाठी आलेल्या दोघांना अटक

घातक शस्त्रांच्या विक्रीसाठी आलेल्या दोघांना अटक
मालाड पोलिसांची कारवाई; पिस्तूल-काडतुसे जप्त
अंधेरी, ता. ८ (बातमीदार) ः घातक शस्त्रांच्या विक्रीसाठी आलेल्या दोघांना मालाड पोलिसांनी अटक केली. शाकीर समशुद्दीन अली आणि विकास श्रीचंद जाटव अशी या दोघांची नावे आहेत. त्यांच्याकडून पोलिसांनी एक देशी बनावटीचे पिस्तूल आणि चार जिवंत काडतुसे जप्त केले आहेत.
मालाड परिसरात काही जण घातक शस्त्रांच्या विक्रीसाठी येणार असल्याची माहिती पोलिसांना मिळाली होती. या माहितीची शहानिशा करण्यासाठी सोमवारी या पथकाने मालाड येथील चिंचोली फाटक, यात्री हॉटेलसमोरील टीसीएसजवळ साध्या वेशात पाळत ठेवली होती. रात्री पावणेबारा वाजता तिथे शाकीर अली आणि विकास जाटव आले होते. या दोघांची हालचाल संशयास्पद वाटताच दोघांनाही पोलिसांनी ताब्यात घेतले होते. त्यांच्या अंगझडतीत पोलिसांना एक पिस्तूल आणि चार काडतुसे सापडले. दोन्ही आरोपी उत्तर प्रदेश व हरियानाचे रहिवासी असून, ते दोघेही घातक शस्त्रांच्या विक्रीसाठी मुंबई शहरात आले होते. त्यांच्याविरुद्ध घातक शस्त्रे बाळगल्याप्रकरणी गुन्हा दाखल करण्यात आला आहे. याच गुन्ह्यात अटक केल्यानंतर त्यांना मंगळवारी बोरिवलीतील स्थानिक न्यायालयात हजर करण्यात आले होते. या वेळी न्यायालयाने त्यांना पोलिस कोठडी सुनावली आहे.